في اليوم الوطني للسعودية ومع التغييرات الجذرية اللي حصلت فيها على المستوى السياسي والاقتصادي والفني والاجتماعي، حبينا نفتكر حاجات اتعملت للمرأة السعودية في أخر خمس سنين لتمكينها وإعطائها الفرصة إنها تسيب بصمة في المجتمع وتشارك في تنمية بلدها.
أول منتخب وطني للسيدات
من فترة قريبة، رئيس الاتحاد الكرة السعودي أعلن إنه هيتم إطلاق أول دوري نسائي في السعودية، علشان يشكلوا منه أول منتخب وطني للسيدات، ودي من ضمن استراتيجية تحول كرة القدم السعودية، واللي واحد من أهدافها الوصول لألف لاعبة سعودية، وعلى الأساس ده تم تعيين المدربة الألمانية مونيكا ستاب مديرة فنية للمنتخب.
أول دفعة نسائية في القوات المسلحة
تم تخريج أول دفعة نسائية بالقوات المسلحة من مركز تدريب الكادر النسائي، واللي هدفه الأساسي هو توفير برامج ومناهج تدريبية مميزة وبيئة تعليمية مثالية وبمقاييس عالمية، علشان تلبي احتياجات الدولة من الكادر النسائي وتخدم أهداف الوزارة في المستقبل.
مجندات في الحرم المكي لأول مرة
وده اللي لاحظناه في شهر رمضان اللي فات لأول مرة، بعد ماتم تدريب أكتر من 80 مجندة وتأهيلهم عن طريق دورات عسكرية تابعة لقوات أمن الحج والعمرة.
تمكينها في مجال صناعة التكنولوجيا
وكانت أكاديمية طويق ليها دور كبير في ده، علمت السيدات مجال البرمجة زيّها زيّ الرجل وده من ضمن أهداف التنمية المستدامة لسنة 2030 وهي تمكين ألف مبرمج ومبرمجة.
تمكينها في المناصب القيادية
هنلاقي إن من فترة صغيرة تم تعيين تالت سفيرة في تاريخ السعودية إيناس الشهوان كسفيرة للمملكة في السويد، وقريب هيبقى في تعيينات لقاضيات سعوديات وده اللي صرح بيه وكيل وزارة الموارد البشرية والتنمية الاجتماعية لتمكين المرأة في السعودية، ومؤخرًا برضه تم تعيين إيمان بنت هباس نائبة لوزير التجارة بالمرتبة الممتازة.
ومن ضمن الحاجات برضه اللي اتعملت لتمكين المرأة السعودية واللي ساعدتها على المستوى الشخصي، إنها تحصل على جواز سفرها بنفسها، وحقها إنها تبلغ عن المولود الجديد في السجل وتسجله من غير ما يبقى معاها الأب، ورفع الوصايا عنها، وعدم تنفيذ بعض الأحكام اللي تخصها إلا بموافقتها، وإن لها الحق في السفر لوحدها طالما عدت الـ21 سنة.