بنحتفل بيوم من أهم الأيام في حياتنا، اللي اتعمل علشان نقف شوية ونفكر في أهمية صحابنا، ونفتكر شخصية كل واحد بمميزاته وعيوبه، ونعرف اللي مصبرنا على بعض كمان والمثل اللي بيقولك “اعرف صاحبك على عيبه” ونعرف إن صحابنا هما الناس بيهوّنوا علينا حياتنا. في اليوم ده كمان بنفتكر شخصيات وأدوار كل واحد فينا اللي بيقوم بيها ومهماته تجاه الشلّة؛ من الرغاي، لماما الشلة اللي شايلة همنا، والصايع اللي الشلة من غيره حقها ضايع، والمنطوي اللي بنخرجه من أوضته بالعافية وبيغلّبنا على ما نخرجه ولا نعمل أي حاجة أو حتى إنه ينزل يقابلنا. وعلشان اختلاف شخصياتنا ده هو اللي بيخلينا نكمل بعض في الشلة الواحدة، عملنا الاختبار ده علشان تعرف أنت أنهي شخصية، ادخل على اللينك وشوف أنت مين.
في الإجابات هتلاقي حاجة تشبهك، ومنها اللي هتقراه تفتكر شخصية حد في صحابك كمان. لو أنت المنطوي اللي قاعد في قوقعته طول الوقت وشايف إن العالم برا شرير، أدي لصحابك فرصة يقعدوا معاك أكتر ويغيروا لك وجهة نظرك، وبننصحك تقضي وقت أطول مع الصايع اللي في الشلة، علشان تحقق تجربة “صيّعني يا عاطف” اللي نجاحها مضمون. أما لو أنت شخصية تانية من شخصيات الاختبار، شاركنا أنت طلعت مين فيهم.