أحد أكتر تداعيات الكورونا تأثيرًا على الناس هو غلق بعض المستشفيات، وتقليل عدد العاملين والمرضى في البعض الآخر كمحاولة للحد من نشر كوفيد-19 وتقليل التكدس. وبما إن شهر أكتوبر هو شهر التوعية بسرطان الثدي، فتزامن الحدث ده مع وجود وباء مأثر على حياتنا كلها يخلي سنة 2020 أهم سنة للتوعية وحث الكل إنه يتعلم إزاي يعمل فحص ذاتي في البيت أو عمل فحوصات في المستشفي في حالة الشك في وجود أي أعراض، علشان تضمن تأمين علاج سريع ومكان في المستشفى في حالة التشخيص بوجود المرض.
سرطان الثدي بيصيب النساء والرجال ولكنه أكثر انتشارًا بين النساء. وبيحصل لما تبدأ بعض خلايا الثدي في النمو بطريقة غير طبيعية وبتنقسم الخلايا دي بسرعة أكبر من الخلايا السليمة وبتستمر لحد ما تتراكم وتشكل كتلة أو ورم. وفي بعض الحالات، ممكن تنتقل الخلايا من خلال الثدي إلى أجزاء أخرى من الجسم.
الأسباب
- أسباب وراثية فبينتقل للأبناء أو البنات عن طريق الجينات الحاملة للمرض وأشهرهم جين 1 لسرطان الثدي (BRCA1) والجين 2 لسرطان الثدي (BRCA)
- التقدم في السن
- وجود تاريخ عائلي للإصابة بالمرض
- السمنة المفرطة
- بدأ الدورة الشهرية في سن مبكرة أو انقطاعها في سن مبكرة
- تناول الكحوليات
- إنجاب الطفل الأول في سن متأخر
- التعرض للإشعاع خلال العلاج
كيفية عمل الفحص الذاتي
مهم جدًا نشر ثقافة عمل فحوصات شهريًا بعد انتهاء الدورة الشهرية لأن ده بيزود فرص اكتشاف المرض في المراحل الأولى واللي بالتالي بتعالي نسب الشفاء لأن السيطرة على المرض من المراحل الأولى. فلازم تعلم كيفية عمل الفحوصات علشان نقدر نقوم بيه بنفسنا كل شهر.
نصائح للوقاية من المرض
كشفت وزارة الصحة والإسكان المصرية عن نصائح للوقاية من سرطان الثدي اللي بتقلل نسبة التعرض للمرض خلال صفحتها الرئيسية على الفيسبوك، واللي منها الاهتمام بعمل فحوصات مبكرة والحفاظ على نظام غذائي معتدل وصحي، لأن السمنة من أسباب الإصابة بالمرض.
ومن المهم كمان تجنب الإفراط في شرب الكحوليات ومناقشة الدكتور في محاولة العثور على بديل لتناول موانع الحمل الفموية أو العلاج الهرموني للسيدات، ورضاعة الطفل طبيعيًا قدر الإمكان وممارسة الرياضة.
ومن الحاجات اللي مبناخدش بالنا منها ولكنها مهما جدًا هو توفير الدعم النفسي لمرضى سرطان الثدي اللي بيفرق معاهم معنويًا وبيساعدها على التعافي بشكل أسرع. وده ممكن نعمله من خلال زيارتهم في المستشفي والكلام معاهم بشكل إيجابي يديهم الأمل في الشفاء. وكمان ممكن يكون من خلال تقديم مساعدات بسيطة مباشرة أو غير مباشرة زي إنك تساعدهم في حاجات بسيطة زي ترتيب البيت معاهم أو حتي إنك تجبلهم أكل.. الحاجات البسيطة بتفرق.