الأعراض المعتادة اللي عرفناها عن الإصابة بفيروس كورونا زي الكحة وارتفاع درجة الحرارة وفقدان الشم والتذوق، تم اكتشاف إن مش هي بس اللي تعتبر دليل على الإصابة، وفيه دراسات ثبت فيها أعراض جديدة ومختلفة ممكن تكون دليل على الإصابة بكوفيد-19، وفي اماكن متفرقة من الجسم، بما إن الحاجات المعتادة معظمها بتصيب الجهاز التنفسي العلوي، وبتكون مشابهة لأعراض البرد أو الأنفلونزا العادية.
الأعراض الجديدة بتبان في الأظافر، أولها بيكون تغير في لون الأظافر نفسها، فبيظهر إحمرار غير معتاد، بتكون على شكل هلال على الأظافر، فوق المنطقة البيضاء في أول الأظافر من ناحية الجلد، والشكل ده يعتبر ظاهرة نادرة بشكل عام، فبالتالي وجوده بيكون مؤشر على العدوى والإصابة بفيروس كورونا. والسبب المحتمل في تكوين الشكل ده بيرجع لتلف الأوعية الدموية اللي بيرتبط بالفيروس نفسه، أو من الاستجابة المناعية ضد الفيروس، واللي بتسبب جلطات دموية صغيرة.
العرض التاني والمرتبط برضه بالأظافر، هو ظهور خطوط على الأظافر بشكل واضح، بيطلق عليها اسم “خطوط Beau” وفي الغالب بتظهر بعد 4 أسابيع من العدوى، والسبب في ظهورها بيحصل لما بيكون فيه انقطاع مؤقت في نمو الأظافر بسبب ضغط جسدي على الجسم، لكن العرض ده مش حصري لفيروس كورونا، وممكن يظهر بسبب أعراض جانبية لأدوية، وبسبب العلاج الكيميائي.
وغير المرتبطة بالأظافر، فيه أعراض تانية بشكل عام لو لاحظت ظهور واحدة منهم بشكل غير طبيعي، لازم تنتبه وتعمل الفحوصات والاستشارات الطبية اللازمة، الأعراض دي بتكون : صعوبة في التنفس، ألم أو ضغط مستمر في الصدر، ارتباك ، عدم القدرة على الاستيقاظ أو البقاء مستيقظًا، تغير في لون الجلد أو الشفاه او الأظافر بألوان شاحبة أو رمادية أو زرقاء، حسب لون البشرة.