السعودية بتتغير بسرعة كبيرة جدًا قدام عنينا النهارده، ووسط التغيرات الكتير اللي بتحصل داخل المجتمع السعودي ونظام الدولة، بنشوف الستات بيخرجوا من الحدود الضيقة اللي عاشوا لقرون محبوسين فيها.
وفي ظل التغيرات الجذرية والسريعة اللي بتحصل هناك، حبينا نحتفل معاكم بسيدة سعودية اكتسحت مجالات الهندسة والطب والعلوم وريادة الأعمال لوحدها، وحققت إنجازات كبيرة فيها.
السيدة السعودية: من حدود القبيلة لاتساع النجوم
واحدة من أكتر عشر مهندسات مؤثرين على مستوى العالم على حسب قائمة (أكاديميا إنلفونس)، وباحثة في العلوم والهندسة ومخترعة ورائدة أعمال، هي أستاذة الكيمياء الصيدلية السعودية غادة المطيري.
بتشتغل المطيري حاليًا كعضو هيئة تدريس في أقسام الهندسة الحيوية وهندسة النانو ومدير مركز التميز في طب وهندسة النانو في معهد الهندسة الطبية في جامعة كاليفورنيا، سان دييغو.
حققت إنجازات كبيرة في مختلف تخصصاتها العلمية، انتهت لأبحاث ودراسات مترجمة للألمانية واليابانية، في المعادن والضوء وعلاقتهم بالطب والكيمياء الخلوية، وهي الدراسات اللي سهلت من خلال (التقنية الدقيقة) فحص الخلايا الحية وتعديل المشاكل العضوية في الجسم من غير جراحة.
اتقدمت أبحاث المطيري للكونجرس الأمريكي في سياق أهم 4 اختراعات طبية سنة 2012، وفي السنة اللي بعدها حصلت على جايزة الإبداع العلمي من منظمة (HEN) لدعم البحث العلمي في أمريكا.
بدأت حياتها كرائدة في مجال الأعمال من خلال فاتتاح شركتها الطبية (elux) بتكلفة 40 مليون دولار، واللي قامت على ابتكارها لجهاز ليزر جديد يقدر يحول الدهون لحرارة بسرعة كبيرة، وبالتالي بيغني عن الحاجة لعمليات شفط الدهون وغيرها.
غادة المطيري: في التعليم والحياة العملية
بدأت المطيري تعليمها الجامعي في كلية العلوم في جامعة أوكسيدنتال في لوس أنجلوس في ولاية كاليفورنيا، سنة 1997، وفي خلال تلات سنين كان معاها بكالوريوس الكيمياء من نفس الجامعة.
حصلت بعدها على شهادة الماجستير والدكتوراة، وكانت رسالة الدكتوراة في كيمياء المواد، وركزت فيها على جسيم دون ذري، وعلى الكيمياء اللي بتدرس التركيب الجزيئي للمواد، واشتغلت في جامعة كاليفورنيا ـ بيركلي مع أساتذة كُبار في مجالات العلوم، على أبحاث في علم النانو.
وبين سنة 2012 و2017، اشتغلت كأستاذ مشارك في جامعة كاليفورنيا، سان دييغو، وأستاذ مساعد قبلها، وهي النهارده زميلة (Kalvi)، وفي مجال الأعمال، بتشغل رئاسة مجلس شركتها الخاصة (elux) وعضو مجلس أمناء (مؤسسة مبادرة مستقبل الاستثمار) من أبريل 2020.
بدايات وطفولة: من أمريكا للسعودية
اتولدت المطيري في 1 نوفمبر عام 1976 في مدينة بورتلاند الأمريكية في ولاية أوريغون، وأبوها وأمها من أصول سعودية، وبتنتمي عيلتها لقبيلة مطير، وهي واحدة من القبائل المعروفة في شبه الجزيرة العربية.
أبوها كان في أمريكا لدراسة العلوم الجنائية مع والدتها نجاة، المدرسة الحاصلة على شهادة في الكيمياء.
رجعت عيلة المطيري للسعودية بعد ما قضوا مدة البعثة في أمريكا، وفي الوقت ده كانت غادة وصلت للمرحلة الابتدائية، قضت المرحلة الابتدائية والاعدادية في جدة في السعودية، وكانت من سن صغير أوي نفسها تتخصص في الكيمياء والفيزياء، وعلشان كده بعد ما أخدت الشهادة الثانوية قدمت على كلية الطب جامعة الملك عبد العزيز في جدة، لكن اترفضت.
انتقلت عيلة المطيري بعدها للرياض، ودرست لمدة سنة في مدرسة أهلية قبل ما تقرر غادة ترجع أمريكا تاني، وتستفيد من جنسيتها الأمريكية علشان تكمل تعليمها الجامعي.