الأغاني دايمًا بتعبر عن حالات بنعيشها وقصص بنشوفها ومشاهد بتلخصها ومشاعر بنحسها، مشاعر حب ومشاعر شجن وحزن وفراق ومشاعر فرح ومشاعر ظلم، وساعات بتديلك طاقة انطلاق وجرعة أمل وتفاؤول، وفي أغاني بتوصف مشاعر الحب زيّ أغاني عيد الأم، وأسمى نوع من أنواع المشاعر هي لما بتتكلم عن حبك وتقديرك لأمك.
ومين يقدر ينسى أغنية ست الحبايب بصوت كروان الشرق، فايزة أحمد، اللي هي واحدة من أهم وأوائل الأغاني اللي اتكلمت عن فضل الأم وعبرت فيها عن مشاعر حب وتقدير لست الكل، لسه لحد دلوقتي الأغنية عايشة معانا ومع كل عيد أم، لازم تشتغل في بيوتنا. ومن وقت ما غنتها من سنة 1959 لسنة 2022، بقت هي الأغنية الرسمية وهديتنا الأولى يوم 21 مارس من كل سنة.
وواحدة من الأغاني المميزة برضه أغنية أمي ثم أمي، أوبريت غنائي بصوت مجموعة أشهر مغنيين الوطن العربي؛ تامر حسني وجنات ويارا ورامي عياش وهيثم شاكر، وكلمات أيمن بهجت قمر، وألحان حميد الشاعري. والأوبريت هو واحد من أهم نجوم التسعينات ومازال، من وقت ما اتعرض سنة 2008 لحد دلوقتي وهو برضه أيقونة من أيقونات عيد الأم.
و النهارده واحنا بنحتفل بعيد الأم، حبينا نجمع لكم قائمة بمجموعة من الأغاني في حب الأم، هتهديها وتسمعّها لست الكل في يوم مميز واستثنائي زيّ ده، خصوصًا لو أنت من الناس اللي مابيعرفوش يعبروا عن حبهم بالكلام، الأغاني هتبقى طريقة مناسبة لك علشان هتقول اللي مش عارف تقوله.
ست الحبايب – فايزة أحمد
أمي ثم أمي- أوبريت غنائي
أول حياتي اتداريت فيكي – وسط البلد
هشام عباس- أمي الحبيبة
الست دي أمي- خالد عجاج
حسين الجاسمي- أمي يا أمي
بحبك يا أمي- رامي صبري
شكرًا يا أمي – أحمد مكي
ياما – محمد فؤاد
والأب مالوش نفس ولا إيه؟
بالرغم إننا دايمًا بندعو إن لازم نعبر عن حبنا للي بنحبهم في أي وقت ومانستناش مناسبة أو يوم علشان نقول قد إيه هما مهمين في حياتنا، بس الاحتفال في الأيام دي، حتى لو بأبسط الحاجات، بتبقى ذكرى جميلة نفتكرها طول العمر، سواء عيد أم أو عيد أب، وهو الإنسان إيه غير شوية ذكريات مع عيلته والناس اللي بيحبهم؟