عودة للأصل: وصفات مصرية غريبة لعلاج نزلات البرد

0

ده الوقت من السنة اللي بنتناوب فيه على الإصابة بنزلات البرد، ولو انت مش عيّان حاليًا فأكيد تعرف حد عيّان. تخيل معايا لو حاولنا نبعد شوية عن الروشتّات والدكاترة والأدوية ونتّبع بعض الوصفات القديمة المجنونة لعلاج البرد!

أهالينا وخصوصًا أجدادنا كانوا مقتنعين تمام الاقتناع إن الوصفات دي بتعالج البرد، ومع إننا مش عارفين أصل أغلب الوصفات دي والسبب وراها، بس حبينا نشارككم أشهرهم وأغربهم في المقالة دي.

الجرائد

أكيد سمعت القصة دي قبل كده، لو مش في البيت فأكيد في فيلم مصري قديم. معظم جدودنا كانوا بيعتقدوا إن وضع جريدة على صدرك بيعالج البرد، وفي الحقيقة احنا معندناش خلفية المعتقد ده أساسه ايه ولا إذا كان فعلًا بيخفف البرد!

لبن بالثوم

اسم يخليك تقشعر، صح؟ من الاسم بس تقدر تستنتج إنه مش حاجة طعمها حلو على الإطلاق، بس بيعتقد الكثير إنه فعلًا بيعالج نزلات البرد. زوّد ثوم مفروم على لبن ساخن وقولنا لو دور البرد اللي عندك اتحسن!

البخور أو اللبان الدكر

امزج مستخرج البخور في شوية مياه وكل حاجة هتخف، أو على الأقل دا اللي ناس كتير بتعتقده!

أوراق شجرة الجوافة

يُقال إن غَلْي أوراق شجرة الجوافة وشُربها كعصير بيعالج أشد نزلات البرد والكُحة. هل دا حقيقي؟ مفيش غير طريقة واحدة تقدر تعرف بيها!

شاي بالعسل والليمون

المشروب المعجزة كما يُطلق عليه، واللي بيعالج التهاب الحلق. امزج العسل مع الليمون والشاي الساخن، واستمتع بالعلاج السحري دا اللي كمان هيحافظ على حرارة جسمك فاترة ويدّفيك في ليالي الشتاء البرد.

آخر كلمة: هل جربت أي وصفة من الوصفات المجنونة دي قبل كده؟

تعليقات
Loading...