طقس متقلب: ازاي الجو ده بتتأثر بيه الأبراج -لو حصل- يعني
طقس جميل جدًا بنعيشه الفترة دي، ماحدش فاهم الجو عايز إيه، حر ولا برد ولا طراوة، ألبس صيفي ولا شتوي، الواحد يصيف الصبح ولو فضل برا لبليل بنفس اللبس الصيفي يسقع، ولو لبست تقيل وعملت حسابك، مش هتستحمل شمس أغسطس اللي متنكرة دي، طب نعمل إيه؟ وللناس اللي بتؤمن بالأبراج وعلاقتها باللي بيحصل حوالينا، وإنها بتتأثر بالأجواء المحيطة، حبينا نتخيل كل برج بيتعامل ازاي في الجو ده.
الجوزاء
الحقيقة أبناء برج الجوزاء طالع عليهم سمعة إنهم متقلبين وشخصيتين عكس بعض وكل الإهانات دي، والجو دلوقتي فعلًا متقلب وكل شوية بشخصية، حيث كده، مش هنتأثر أوي يعني علشان عادي متعودين على طبع التقلبات ده، وهنتعامل مع الجو عادي.. يجيلنا كده نجيله كده.
العقرب
زمايلنا في برج العقرب اللي شاركونا في كتابة المقال ده، لقيناهم بيستغلوا حتة الغموض اللي عندهم دي في التعامل مع الجو، وشايفينه شبههم في غموضه ومفاجأته كل يوم وواخدينه بمبدأ “مبروم على مبروم مايلفش”.
الأسد
من أشهر طباعه الإخلاص، ده بيفضل مُخلص للبس الشتا ومهما الجو يحرر ونقوله هتموت البس لبس خفيف، يقول أبدًا، الشتا راجع، بس الإخلاص ده مش هينفعه في الجو اللي درجة الحرارة فيه مش راضية تقل عن 35 درجة.
الميزان
شخصية “سوما العاشق” اللي بيتميز بيها البرج ده عايشة دلوقتي في دور الضحية وازاي الجو يبقى عامل كده وبيصيحوا في كل مكان، مشاعرهم مش مستحملة تقلبات الجو، ودة بناء على دراسة عملناها على زمايلنا برضه اللي من برج الميزان وشاركونا في المقال.
الحمل
بالعُقد والكلاكيع واللخبطة اللي جواهم، وفي نفس الوقت بيبانوا من برا بمقولة “أسد يالا في إيه” ومش بيصيحوا ومش مضايقين من الجو الحر البرد ده، لكن جواهم بسكوتة وبينهاروا من الجو اللي مش فاهمينه ومش عارفين يعملوا إيه.
السرطان
بيغلب عليهم حس المفتش وعايزين يعرفوا أسباب تغير الجو وتقلباته، وبيقعدوا يدوروا في أصل الموضوع وليه الكوكب بيتغير وموضوع كبير كده. وهيفضل يفكر في الموضوع لحد ما يجيب أخره، أو الموضوع هو اللي يقضي عليه مش عارفين.