طقس استثنائي وغابات: اعرف أكتر عن منطقة “السودة” أهم مصيف في السعودية

غير اللي عارفينه عن طقس المملكة العربية السعودية من ارتفاع درجات الحرارة والرطوبة، وفي عز الصيف دلوقتي، السودة بتتمتع بجو لطيف مابيعديش 27 درجة في النهار، و18 درجة بالليل، منطقة بتتميز بطقس استثنائي وغابات وأشجار وقمم جبلية وأمطار، بتختلف عن جو باقي المناطق في المملكة، وبتعتبر أهم مصيف في السعودية سواء للسكان المحليين أو السياح من كل مكان في العالم، تعالوا نعرف أكتر عن السودة.

السودة موجودة في مدينة أبها، في جنوب غرب المملكة، وبتسقبل يوميًا حوالي 70 ألف زائر، يستمتعوا بنسمات الهوا اللطيف ويهربوا من حر ورطوبة الصيف، وبيقوموا بأنشطة سياحية مختلفة، وسط الطبيعة والغابات الخضراء، ولإن السودة فيها أعلى قمة جبلية في الجزيرة العربية، الزوار كمان بيقوموا بأنشطة جبلية زيّ تسلق الجبال والصخور وركوب التلفريك. وعلشان كده بتعتبر السودة أهم مصيف في المملكة العربية السعودية.

الضباب في السودة بيميزها طول السنة باختلاف الفصول، علشان كده دايمًا هتحس إن السحاب داخل القمم الجبلية، بنفس المشاهد اللي متعودين نشوفها في الأفلام في أوروبا، وأغلبنا مايعرفش عن وجود أماكن زيّ دي في الوطن العربي، كمان وجود منطقة بالصفات دي كلها في السعودية وتعتبر بتختلف كليًا عن الأجواء والطبيعة اللي في باقي مناطق المملكة، يعتبر تنوع كبير بيكون سبب في جذب الزوار من كل مكان.

آخر كلمة: ماتفوتوش قراءة: على عكس حال باقي البلد: مدينة البترون السياحية اللي قدرت تنجو من أزمات لبنان

تعليقات
Loading...