من بعد افتتاح طريق الساحل الشمالي الجديد والسوشيال ميديا مقلوبة ببوستات بتعلق على مشاكل الطريق ومدى تعقيده، فـظهر على تويتر فيديو مخيف للطريقة العشوائية اللي بتتحرك بيها العربيات على الطريق.
وشاركت الإعلامية لميس الحديدي بتويت موجهة لوزير النقل كامل الوزير بتقول فيها: “لا ادري إن كنت في أيام قليله ستتمكن من اصلاح كباري “البلاي ستيشن” في طريق الساحل او انقاذ المليارات التي انفقت، أو الاستثمارات المعرضة للخطر ولكن مانرجوه هو أن تحاول انقاذ الارواح حتي لو اغلقت الكباري العظمي مؤقتا”
وكتبت داليا جميل: “طريق الساحل الشمالى الجديد بالمحاور فى منتهى الخطورة، الرجاء الاعتراف بالاخطاء وتصحيحها قبل حدوث كوارث. المطبلاتيه يمتنعون دي ارواح ناس مفيهاش تطبيل”.
كتب عمرو حمدون رأي مخالف لناس ;jdv في سياق مشكلة طريق الساحل الشمالي: “مشكلة طريق الساحل مش هندسيه مشكلته ان الناس مش متعوده ع طرق بالشكل ده الناس متعوده ف مصر ف السواقه تخالف النظام تمشي عكس”.
وبالإضافة للتعليقات الجادة اللي بتنتقد الطريق الجديد ظهرت ميمز وفيديوهات كتير بتهزر على المشكلة، زي ميم الكنافة واللي بنى مصر كان في الأصل حلواني.
وعلق إسلام جابر عن حالة العشوائية اللي بتحصل على طريق الساحل من خلال ميم عن نظام الملاحة بالأقمار الاصطناعية اللي بقى في حالة فوضى على طريق الساحل الشمالي الجديد.
تدخل الرئيس لحل مشكلة طريق الساحل الشمالي
امبارح الأحد في برنامج الحكاية مع الإعلامي المصري عمرو أديب وفي مداخلة تليفونية أكد الفريق كامل الوزير، وزير النقل، إن الرئيس عبدالفتاح السيسي وجه لضرورة حل مشكلة طريق الساحل الشمالي الجديد في أسرع وقت ممكن.
وأكد الوزير في المداخلة مع عمرو أديب إن في لجنة عاينت المشاكل الموجودة في الطريق الجديد، ووضح إنهم بيشتغلوا على تصليحها بالفعل في أسرع وقت.
وقال الإعلامي عمرو أديب: “بقالنا شهر الناس بتتكلم عن طريق الساحل الشمالي، وأظن المسألة مش محتاجة نقد إضافي، الناس عملت كوميكس وأكيد عرفتوا إن في مشكلة في طريق الساحل”.
ووضح أديب إن كل اللي بيطلبه هو حل للمشكلة، وطالب بإصدار بيان واضح من أي جهة في مصر ومايكونش البيان هو رسم توضيحي لإزاي نطلع وننزل الكوبري، وطلب أديب من الجهات المسئولة لإما يوضحوا إنهم لسه مخلصوش الطريق ولما يخلصوا هتوضح معالمه بشكل أفضل، أو بيان بيوضح إن في سلبيات وأخطاء ظهرت بعد إنهاء الطريق ولازم يتم إصلاحها.