شئنا أم أبينا، ماحدش فينا مش بيحتاج زيارة للدكتور في وقت من الأوقات، والدكاترة جزء أصيل من حياتنا، لكن كمان الجزء ده بيحصل فيه مواقف بتخليك تضحك في عز التعب، الدكاترة رغم إن حياتهم المهنية صعبة وبيمروا فيها بلحظات تقيلة على القلب، وطبيعة عملهم شاقة ومرهقة، لكن ساعات في وسط تعب اليوم يحصل موقف تلقائي كده يضحكهم ويقلب يومهم ويفضلوا فاكرينه، ممكن من كتر غرابة الإفيه كمان يضحكوا، زي المواقف اللي صادفنا منها على السوشيال ميديا، وعرفنا الباقي من دكاترة سألناهم عن مواقف وقصص مضحكة.
مياه مخلل ومُغات
دكتور حكى لنا واقعة في منتهى الغرابة والضحك: “دخل عليا العيادة اتنين مرضى وغالبًا قرايب، واحد فيهم بيشتكي إن عنده حموضة شديدة مش عارف سببها، والتاني بيشتكي إنه حاسس إن زوره واجعه جدًا لكن من غير أي أعراض تانية للبرد، لما اتكلمت معاهم شوية وابتديت أسأل عن الحاجات اللي أكلوها مثلًا، قبل حتى ما أسأل عن التاريخ المرضي، لقيت الأولاني اللي عنده حموضة بيقول لي إنه شرب 4 كوبايات موغات، والتاني اللي زوره بيوجعه طلع شارب كوباية مياه مخلل حراقة، أنا عجزت عن الردود العلمية والطبية والإنسانية في اللحظة دي”.
سكر المريض معلقتين
ده موقف عشوائي صادفنا على السوشيال ميديا من فترة، دكتور بيحكي: “وأنا باخد تاريخ المريض وبعرف منه الأمراض اللي بيعاني منها، خصوصًا لو أمراض مزمنة، وحالتها إيه معاه، سألت مريض بتلقائية بعد ما الممرضة قاست له السكر: “سكرك كام” فرد بتلقائية أكبر “معلقتين يا دكتور” وأنا وقفت متنح دقيقة من الإجابة”.
ولا كإن المريض واخد فكرة عن المستشفى إنها هتقدم له واجب الضيافة الأول بخربوش شاي قبل ما أي حد فيها يفتتح الكلام عن حالته المرضية أو يشوف ماله ويعالجه.
معاناة في صمت
كل ده كوم، ومعاناة الأطفال أحباب الله اللي لسه حتى مابيتكلموش، كوم تاني.
دكاترة الأطفال عندهم نوع آخر من القصص والطرائف، دكتور أطفال بيحكي: “جت لي العيادة أم بطفلها الرضيع اللي عنده أربع شهور، والولد بيعيط من الألم لكن الأم مش راضية تعترف الولد ماله أو أكل إيه، وأنا صممت إنها تقول خصوصًا إن الولد لسانه كان لونه برتقالي، لحد ما اعترفت أخيرًا إن والده شرّبه مشروب غازي، علشان حس إن الولد نفسه فيه”.
الوقاية خير من العلاج
دكتور تاني بيحكي عن غرابة الآباء والأمهات في الكشف، وعن الأسئلة الكتير والفضول اللي بيكون عندهم، لكن أغرب موقف قابله: “أب خمسيني جاب ولاده الاتنين علشان يكشفوا، الغريب إن واحد منهم بس هو اللي مريض والتاني صحته كويسة، ولما كتبت الدواء للمريض قال لي أكتب نفس الدواء لأخوه، علشان ازاي هيشوف أخوه بيشرب من الدواء وهو ما يشربش، خلّي الاتنين ياخدوا الدواء أهو برضه التاني مايعياش”.
دلوقتي هناخد الدواء قبل المرض كمان علشان “الوقاية خير من العلاج” بقت بالأدوية اليومين دول.
أمراض القلب < الحب
دكتور تاني بيحكي: “كنت باخد تاريخ مرضي من ست كبيرة في السن وبعرف الأمراض اللي بتعاني منها، بسألها لو عندها مشاكل في القلب، ردت بمنتهى التلقائية قالت لي “آه حبيت مرة” وهنا سكتت جميع أصوات العلم والعلماء.
احنا هنلغي كل أمراض القلب اللي الناس قعدوا يدرسوا فيها سنين وسنين، ونعتمد مشاكل الحب والعلاقات العاطفية كسبب أول ورئيسي لأمراض القلب.
احنا عارفين يا حاجّة إن الحب وجع قلب وكل حاجة، بس الدكتور عايز يعرف تاريخك المرضي علشان يشخص حالتك مش علشان يشتغل أسامة منير في علاقتك بالحاج.