صُناع محتوى سعوديين لازم تتابعهم!
في الوقت اللي التلفزيون العربي مفيهوش غير أخبار عن فيروس كورونا وأعداد الإصابات اللي بتزيد كل يوم عن التاني، صعب الواحد يلاقي حاجة يقدر يتفرج عليها من غير ما يكون مكتئب أو قلقان، كتير مننا بقى عنده وقت فراغ زيادة مش عارف ممكن يستغله إزاي.
“يوتيوبرز” و”إنفلونسرز” كتير من السعودية بقالهم سنين بيصنعوا محتوى مختلف وجديد وده خلاهم يقدروا يعملوا إسم لنفسهم بين مجتمعات الشباب. من غير ما نطول عليكم دي قائمة بأحسن صناع محتوى في المملكة عشان تقدروا تستمتعوا بوقتكم وتحاولوا تفصلوا شوية من التفكير في فيروس الكورونا.
فليم يا غليم
مشعل الجاسر حقق نجاح واسع بعد ما بدأ قناة اليوتيوب بتاعته “فليم يا غليم” اللي بيعمل فيها أفلام قصيرة ساخرة، واللي فيها دايمًا بيركز على عادات وتقاليد من الشرق الأوسط ممكن البعض يقول عليها رجعية. كمان ليه أكتر من فيلم قصير بيقارن بين الثقافة في الشرق والغرب. أفلام مشعل كلها تصويرها مختلف عن أي حاجة شوفناها قبل كدا وفيها ابداع مش طبيعي.
هشام فقيه
هشام فقيه مش بس فنان ساخر، لا ده كمان ممثل وكاتب ومنتج. في 2013، بعد ما نشر فيديو “No Woman No Drive” اللي قدر يتخطى حاجز الـ 16 مليون مشاهدة، هشام بقى من أشهر الـ “إنفلونسرز” السعزديين على السوشيال ميديا. وفي 2016 مثل في فيلم “بركة يقابل بركة” اللي من إنتاجه الشخصي وموجود على نتفلكس.
تلفاز 11
تلفاز 11 هي واحدة من أهم قنوات اليوتيوب الموجودة في السعودية. بعد تأسيسها في سنة 2011، القناة في خلال 9 سنين قدرت تتخطى حاجز الـ 3 مليون مشترك وتحقق أكتر من 300 مليون مشاهدة. الفيديوهات على تلفاز 11 تعليمية وساخرة في نفس الوقت. المحتوى على تلفاز 11 مُنوع والقناة بتعتبر منصة لكتير من المبدعين السعوديين يقدموا فيها شغلهم.
أسرار عارف
“الفلوجر” السعودية أسرار عارف ظهرت على الساحة في 2012 بقناة الويتيوب بتاعتها “دراما كوين”، واللي فيها قدمت محتوى متنوع من فيديوهات كوميديا لنصايح تجميل و وصفات أكل. القناة عندها أكتر من مليون مشاركة وحوالي 140 مليون مشاهدة.
لجين عمران
لجين عمران واحدة من أهم الشخصيات المؤثرة في السعودية؛ بدأت حياتها العملية لما قدمت برنامج “صباح الخير يا عرب”، ومع الوقت قدرت تجمع أكتر من 8 مليون متابع على إنتسجرام.
Tamtam
المغنية السعودية طمطم ظهرت لأول مرة لما نشرت فيديو في 2014 تحت عنوان “Little Girl” أو بالعربي “فتاة صغيرة”، ومن ساعتها وهي بتحقق نجاح ورا التاني. أخر فيديو لطمطم قدر يتخطى حاجز المليون مشاهدة ومن إخراج مشعل الجاسر مؤسس فليم يا غليم اللي إتكلمنا عنه.
سعودي ريبورترز
الأخين التوأم عبدالعزيز وعبدالله بكر بدأوا مشوارهم على اليوتيوب في 2010 بمجموعة فيديوهات كوميدية ومن ساعتها وهما مكملين. دلوقتي القناة بتاعتهم “سعودي ريبورترز” وصلت لأكتر من 6 مليون مشاركة وتخطت حاجز المليار مشاهدة. القناة بتاعتهم تعتبر واحدة من الأكبر في العالم العربي.
عبدالله الجمعة
الرحالة والمؤلف السعودي عبالله الجمعة حقق نجاح كبير في 2013 بعد ما نشر كتابه “حكايا سعودي في أوروبا” اللي كان من أفضل الكتب مبيعًا في السنة دي. الإنستجرام بتاع عبدالله مليان صور ليه من كل أنحاء العلم بعد ما قدر يزور دول كتير في أوروبا والأمريكتين وأفريقي وجنوب شرق أسيا. لو بتحب السفر ومحتاج محتوى يشجعك على ده، لازم تتابع عبدالله.