الفنانة شيرين عبد الوهاب أعلنت إنها بتحضر دلوقتي لفيلم من بطولتها ومن إنتاج نتفليكس، والفيلم هيكون عن قصة حياتها، وده في تصريحات على هامش حفلها اللي تمت إقامته مؤخرًا في دبي.
الفيلم هيتناول قصة حياتها ونجاحها، ومن المقرر إنها هتظهر فيه بشخصيتها الحقيقية، وهتقوم طفلة صغيرة بدور شيرين في مرحلة الطفولة، لكنها أكدت إن الطفلة اللي هتقوم بدورها في الفيلم مش هتكون واحدة من بناتها.
شيرين قالت في الحفلة: “أنا سعيدة بالعودة إلى حياتي، السمكة رجعت للبحر، وأيضًا سعيدة لرجوعي إلى الحفلات، وإن شاء الله هقدم كل جديد خلال الفترة المقبلة والجمهور واحشني جدًا وواحشني شغلي، ولو كنت اتأخرت عليكم دي كانت لظروف نفسية أكبر مني أوي، واختفائي كان جزء من نقاهة كنت محتاجة لها بقالي سنين”.
جدير بالذكر، إن أول مسلسل لشيرين (طريقي) ناس كتير افتكرت وقتها إنه إشارة لقصة حياتها الحقيقية، لكنها نفت ده مؤخرًا في تصريحات صحفية وقالت إن المسلسل قصته مش بتعبر عن قصة حياتها، وده كان من 2015، لكن دلوقتي شيرين هتقدم قصة حياتها في فيلم من إنتاج نتفليكس.