ضمن خطوات في اتجاه حلول التنقل الذكي والصديق للبيئة، رجل الأعمال المصري أحمد أبو هشيمة أعلن عن تعاون بين مجموعة المصريين للصناعة والاستثمار والهيئة العربية للتصنيع وشركة برق الإماراتية المتخصصة في مجال التنقل الذكي والحلول اللوجستية، التعاون ده هتكون نتائجه وصول أول دفعة من السكوتر الكهربائي “برق رينا ماكس” لمصر في نهاية سنة 2022 بشكل رسمي.
الدفعة الأولى هتتكون من 50 ألف سكوتر، من تصنيع شركة برق الإماراتية، والسكوتر هيكون متوفر بشكل مبدئي في الإمارات ومصر والسعودية، وهيكون بعقد شهري. والسكوتر ده مخصص لتوصيل الطلبات وشحن البضائع، وده ضمن عدد من مشاريع تنموية هدفها خلق نقلة نوعية في مجال التنقل الذكي في مصر والمنطقة العربية، حسب اللي قاله أبو هشيمة على صفحته.
أما مواصفات سكوتر “رينا ماكس” نفسه، فهو بيشتغل بالطاقة الكهربائية بشكل كامل، وتم تطويره بالشراكة مع سلسلة مطاعم “أمريكانا Americana” ومنصة التوصيل الإمارتية “جاهز Jahez”، وتم تصميمه وهندسته علشان يواجه تحديات التنقل الكهربائي في منطقة الشرق الأوسط، لإن تجهيزاته بتشمل نظام تبريد خاص بالبطارية. أما الصندوق اللي مخصص لحمل البضائع، فهو معزول بطبقة آمنة على الأكل، وكمان بيتم التحكم في درجة حرارته عن طريق وحدة تحكم في التسخين والتبريد.
تم تزويد السكوتر الكهربائي بمحرك كهربائي بقوة 9 كيلو واط، بسرعة قصوى متوسطة بين 97 إلى 120 كم/ساعة بتعتمد على حسب ظروف السواقة، وتم تزويد رينا ماكس كمان بترس لرجوع لورا، وأساليب مختلفة في السواقة؛ اقتصادي، وتيربو، عادي، وكمان فيه شاشة LCD مقاس 8 بوصات، بتدعم الاتصال بالموبايل عن طريق تكنولوجيا Apple Carplay و Android Auto.