يسرا من الفنانات اللي دايمًا بتنتقي أدوارها بمنتهى الجدية والتأني، علشان كده يوم ما بيتحط اسمها كبطلة لأى عمل، بنلاقي كل الناس عايزة تتفرج عليه وبيتحط في الـ “watching list” كده على طول. وده السبب كمان إن مهما كان عدد السنين اللي بيمر عليها العمل، بيفضل عايش وبتفضل الناس حابه إنها تزور بعض حلقاتها من وقت للتاني. وبجانب النجاح الكبير اللي اتحقق في آخر مسلسل ليسرا “حرب أهلية” في موسم رمضان اللي فات، حبينا ترجع بالسنين لورا شوية ونفتكر مسلسلات يسرا القديمة اللي لسا بتقدر من خلالهم إنها تضع البسمة على وشوشنا، للذكريات الجميلة اللي بتفكرنا بيها.
أين قلبي
المسلسل اللي كانت طالعة في يسرا أم مكافحة بتربي أولادها لوحدها بعد وفاة زوجها، وكانت بتواجه مشاكل في شغلها وحياتها بسبب إنها دايمًا عايزة تمشي في الطريق الصح حتى لما حسن حسني أخو زوجها أخد ميراث أخوه. المسلسل كان فعلًا لطيف وكمان بيبعت رسائل هادفة.
ملك روحي
ملك روحي من المسلسلات اللي كانت عاملة ضجة كبيرة وقت نزولها، وبرغم إنها مكانتش مُقنعة أوى إننا نشوف يسرا وأحمد عز بتجمعهم قصة حب وحياة زوجية نظرًا لفارق السن الكبير، ولكن الحقيقة إن الحبكة الدرامية والأحداث التصاعدية اللي شوفناها خلال الحلقات بجانب قدرات التمثيل العالية، خرجت لنا مسلسل ناجح وشيق بكل المقاييس!
قضية رأى عام
ده يعتبر من أهم الأعمال اللي قدمتها يسرا خلال مشوارها الفني لأنها قدمت قضية الاغتصاب واللي مكانش وقتها بيتم تناول قضايا جريئة ومهمة بالحجم ده. فبجانب استمتعنا بمشاهدة عمل جيد، قام العمل برفع مستوى الوعى عند أفراد المجتمع تجاه القضية وحاول كسر وصمة العار اللي بتلحق بالضحية بدل من الجاني.
لقاء على الهوا
لقاء على الهوا كان كمان من الأعمال اللي ظهرت فيها يسرا مذيعة عندها ضمير وشغف لتقدية شغلها على أكمل وجه، وبنشوف خلال الحلقات تصاعد كبير من مشاكل عائلية، لمؤامرات في الشغل وعمليات اختطاف.
رأفت الهجان
بدون شك مسلسل رأفت الهجان كان ومازال تحفة فنية الوطن العربي كله بيتحاكى بيه حتى الآن وطبعًا يسرا كان دورها محوري وفعال خلال الحلقات.
في أيد أمينة
مسلسل قامت فيه يسرا بدور صحفية بتحترم مهنتها و بتسعى لكشف الحقائق والفساد وده اللي بيعرضها لمشاكل وأزمات كتير. ومع ذالك بتصر على الاستمرار في مسعاها رافضة كل الضغوط والتهديدات، بل والنصائح من قبل المقربين منها، خوفاً على حياتها.