من أول ظهور ليه في مسلسل “إش إش” بموسم رمضان 2025، رجب الجريتلي كان الشخصية اللي الكل بيخاف منها.. نظراته حادة، تصرفاته مخيفة، وكأن الشر متجسد فيه!
لكن فجأة، وبمجرد ما اتجوز مي عمر (إش إش)، قلب الترابيزة على الكل، وبقى “الكراش” الرسمي لموسم رمضان 2025!
البنات اللي كانوا مكسوفين يعترفوا بإعجابهم بشخصيته، خوفًا من إنهم يطلعوا توكسيك، قرروا يواجهوا المجتمع ويفجروا اعترافاتهم على السوشيال ميديا بشعار “كفاية خوف من المجتمع”!
وده مش بس خلّى اسم رجب الجريتلي يتصدر التريند، ده كمان رجّع أغنية “رجب حوش صاحبك عني” لهيفاء وهبي للواجهة من تاني، بعد ما الزمن كان غطاها بالتراب!
التريند وصل لدرجة إن البنات نفسها تطلب من مي عمر (إش إش) تنسى اللي فات، وتسامح رجب، وتقع في غرامه زيهم.. فهل الحب هيغير مصير الأحداث؟ ولا هتفضل إش إش مصممة على الانتقام؟
طب بجد، إيه سر الجاذبية اللي خلّت رجب الجريتلي فتى الأحلام الجديد ورفعت شعار “رجب الجريتلي ماي تايب”؟
لا تفوّت قراءة: كيف نجح مصطفى غريب في التسلل إلى قلوب الجماهير؟ السر في خلطة الكوميديا
رجب الجريتلي.. سامح إش إش على أخطاء الماضي
من أول ما اتقابلوا، مي عمر (إش إش) صارحته إنها ماكانتش أول مرة تحب، لكنه مازعلش ولا عاتبها.
سامحها ونسي كل اللي فات، وما استغلش الموضوع ضدها في أي خناقة أو ضغط عليها.
بجد.. رجب الجريتلي تصرف برجولة وأخلاق، زي أي راجل متحضر!
غيرة رجب الجريتلي.. ذكاء مش تحكم!
كل البنات بتحب الراجل اللي يغير عليها، ورجب غيرته كانت بذكاء مش تعصب.
بيعبر عن اللي مضايقه بطريقة تخلي اللي قدامه يتغير من غير ما يحس بالضغط.
حتى لما إش إش قالت عايزة تشتغل، ماعترضش، بس عرف يقنعها بطريقته!
رجب الجريتلي.. حنيّة من غير إجبار!
البنات شافوا قد إيه رجب حنين وبيهتم بتفاصيل إش إش، حتى في أبسط الحاجات.
لما طلب منها ترقصله، وافقت رغم إنها بتكره ده، لكنه أول ما حس إنها مضايقة، وقفها فورًا.
وده مع إنه راجل كلمته ما بتنزلش الأرض، بس ماقدرش يزعلها.. مش زي الرجالة التوكسيك!
مش بيسبلها مرتب مصروف إيدها لأ ده سايب لها خزنة لمصروف إيدها!
من أكتر المشاهد اللي خلت البنات تقع في حب رجب، لما عرف إنها مش بتحب تطلب فلوس.
تاني يوم، بدل ما يحدد لها مصروف، ساب لها خزنة كاملة وقالها: “اصرفي زي ما تحبي، مالي هو مالك!”
يعني مش بس بيحترم استقلالها، ده كمان بيغرقها دهب.. ويا حج، عارف جرام الدهب بقى بكام دلوقتي؟!
لا تفوّت قراءة: أكثر المسلسلات مشاهدة في رمضان 2025.. من احتل الصدارة؟
رجب الجريتلي.. بيكبرها قدام الكل ويدافع عنها!
دايمًا بيدي إش إش قيمتها، عمره ما قلل منها قدام حد أو زعق لها. حتى لما مراته الأولى حاولت توقع بينهم، كان دايمًا في ظهرها ويدافع عنها.
ولو غلطت؟ ينصحها بينهم وبين بعض، بس قدام الناس.. بيكبرها!
رجب الجريتلي.. بيصلح اللي فات بإيده!
زمان أذى أهل إش إش ونصب على أمها، وده كان سبب جوازها منه للانتقام. لكن من غير ما حد يطلب، قرر يصلح غلطه ويرجع جزء من الفلوس.
علشان خاطر عيونها، سلّم لها 3 مليون جنيه.. وأهو كده الرجولة بجد!
لا تفوّت قراءة: يعني إيه عنقودي في مسلسل سيد الناس؟ الجارحي أبو العباس طلع عنقودي زي أبوه الحاج رشدي!
رجب الجريتلي.. راجل دوغري وكلمته واحدة!
أول ما إش إش قالتله “بحبك”، ما لفش ودور.. خدها على المأذون فورًا! مش زي غيره يشوفها رقاصة ويتكسف منها، ده عمل لها أكبر فرح في المنطقة.
مش زي مختار اللي لف ودار وضحك عليها، لأن رجب راجل بشخصية قوية وكلمته من دماغه!
رجب الجريتلي.. متصالح مع نفسه وعارف هو عايز إيه!
فاهم إن إش إش ممكن تكون جاية تنتقم، لكنه مكمل معاها لأنه مرتاح لها. وعارف إن أهله بيستغلوه، بس محدد لهم حدودهم من غير ما يبقى قاسي.
سايب الكل يسترزق من وراه، بس من غير ما حد يضحك عليه، وعنده وعي باحتياجاته. حتى لما شاف إش إش بتتعلم إنجليزي، قالها: “علميني معاكي!”
عارفين الكلام ده هيوجع رجالة كتير، بس رجب فهم الستات صح.. ناقصه بس عمرة وصدقة ويبقى كملها!
وأنتِ يا إش إش.. فكري قبل ما تنتقمي!