رايح دبي؟ دول أحسن 15 مول هيعيشوك تجربة مثالية للتسوق

بواسطة آلاء عبد الحكيم في ديسمبر 23, 2021

المولات ومراكز التسوق من الحاجات الأساسية في أي خروجة، لإنك تقدر تلاقي كل اللي محتاجه ببساطة ومن غير أي مجهود من مكان واحد بس! تقدر تشتري هدوم وتاكل وتلعب وتقضي وقت لطيف وأنت في نفس المكان ومن غير ما تضيع وقتك، ولما تيجي تتكلم على أحسن الأماكن اللي تقدر تتسوق منهم وعن أفضل المولات اللي تقدر تروحها وتستمتع بها ومناسبة جدًا لأجواء رأس السنة، فأكيد هتبقى دبي هي الخيار الأول لناس كتير، طب إيه سبب ده؟

لإنها عندها أفضل وأكبر المراكز التجارية اللي موجودة في العالم، ده غير إنها بتتنوع من أسواق على الطراز الأوروبي أو بسيطة أو اللي بتدي لك طابع كلاسيكي، بشكل يقدم لك تجربة تسوق مثالية، زيّ دبي مول اللي بيتحط على قائمة أفضل وأكبر مراكز التسوق في العالم! لإنه بيحتوي على أكتر من 1400 متجر تجاري وأكتر من 200 مطعم، ومن بعده في القائمة ييجي مول الإمارات بيحتوي على 630 متجر يعرض فيه أشهر العلامات التجارية، ومول ابن بطوطة اللي تصاميمه مستوحاة من حياة الرحالة الشهير ابن بطوطة. وللسبب ده جمعنالك أحسن 15 مول تقضي فيهم رأس السنة.