محمود رضا كان من أهم وأول مُصممين رقصات الفلكلور في مصر اللي ابتدى حياته العملية كهاوى للرقص الإيقاعي، وبعدين احترف الرقص وتصميم الرقصات الشعبية. وفي سنة 1959 كون فرقة رضا، أول فرقة رقص فولكلورى بتجمع بين الرقصات الشعبية والتراثية في مصر، واتنقل بيها من المحلية للعالمية واشتهرت بعروضها المميزة جوا وبرا مصر.
واحتفاءً بدوره ومكانته الكبيرة في عالم الرقص الفلكولوري، قررت دار الأوبرا المصرية إنها تُحيي ذكراه في احتفالية فنية باسم “ذكريات الكرنك” لتكريم اسمه والفن الشعبي اللي أضافه رضا وفرقته على مر السنين.
وكان من المقرر إن الاحتفالية دي تتم يوم الاربعاء الموافق 30 سبتمبر، ولكن نظرًا لحالة الحداد العام اللي أعلنتها مصر بعد وفاة الشيخ جابر الأحمد أمير دولة الكويت، اتأجل معاد الاحتفالية لمساء يوم الأثنين 5 أكتوبر والأربعاء ٧ أكتوبر الجايين.
الاحتفالية هيقدمها باليه أوبرا القاهرة تحت إشراف مديرها الفنى أرمينيا كامل، وبمصاحبة أوركسترا أوبرا القاهرة بقيادة ورؤية موسيقية من المايسترو هشام جبر، ومن إخراج هشام الطلي. وهيكون في مزيج بين استعراضات وموسيقى ومشاهد فيلم “غرام في الكرنك” اللي مليان تصميمات حركية للراحل محمود رضا، واللي عبرت عن التراث الفني والموسيقي لمصر.