د. أحمد سالمان ولقاح جامعة أوكسفورد لـ “كوفيد-19″، كل اللي محتاج تعرفه..
العالم بقاله أكتر من 5 شهور في صراع طبي مع فيروس الكورونا المستجد اللي ظهر في الصين في أخر 2019 في مقاطعة ووهان، ومن ساعتها لحد دلوقتي وصل عدد المصابين بيه لأكتر من 7.5 مليون حالة. دول كتير سارعت بتطبيق إجرائات احترازية عشان تحمي مواطنيها من انتشار العدوى كان منها وقف حركة الطيران وتطبيق حظر التجوال اللي قيد حركة أكتر من تلت سكان العالم.
في الوقت ده معظم المستشفيات والجامعات والمراكز البحثية اشتغلوا على علاج أو لقاح لـ “كوفيد-19″، واحدة منهم كانت الجامعة البريطانية أوكسفورد اللي كان الدكتور المصري أحمد سالمان عضو في فريقها.
من قريب أعلن مستشار رئيس الجمهورية لشؤون الصحة الدكتور عوض تاج الدين إن مصر في طريقها للحصول على لقاح جامعة أوكسفورد اللي بالتعاون مع الشركات في مصر هيتم انتاج ملايين الجرعات منه اللي هيتم توزيعها بسعر غير مكلف. اللقاح ده واحد من أهم الأسلحة البيولوجية اللي العلماء شغالين عليها دلوقتي لمواجهة الفيروس وده لإنه أظهر نتائج مبشرة جدًا لما تم تجربته على الحالات.
د. أحمد سالمان دكتور المناعة وأبحاث تطوير العقارات بمعهد إدوارد جينر بجامعة أوكسفورد وزميل كلية كيلوج بالجماعة، وواحد من أبناء كلية العلوم في جامعة عين شمس، والأستاذ المساعد الرئيسي للبروفيسور أدريان هيل، مدير معهد إدوارد جينر في جامعة أوكسفورد، شغال على اللقاح بقاله كذا شهر، ووضح إن الفريق من شهر مارس سرع مسيرة البحث وبعد عدد من التجارب على الحيوانات إدت نتائج إيجابية، الحكومة البريطانية وافقت على بدأ التجارب السريرية على البشر ولمدة شهرين.
بدأت التجارب بـ 11 شخص و دلوقتي وصل عدد المتطوعين لـ 5000 في المرحلة الأولى، وبيحاول الباحثين دلوقتي قياس مدى تأثير اللقاح على المصاب.
الدكتور محمد عوض تاج الدين صرح بإن اللقاح هيكون متوفر في مصر في شهر سبتمبر اللي جاي، وإن هيكون في في الدفعة الأولى تطعيمات بحوالي 400 مليون جرعة، والدفعة التانية في 2021 هتوصل لمليار جرعة، ومصر في الفترة الأخيرة دي كانت شغالة على إنها تأمن لشعبها جرعات كافية عشان تضمن نهاية الفيروس وسط ناسها.