واحدة من الطرق الجديدة اللي اضطر صُناع السينما إنهم يلجأوا ليها في ظل تداعيات كورونا وغلق السينمات لوقت مكنش قليل، هو اللجوء لمنصات إلكترونية ينزلوا عليها أفلامهم علشان يقدر الجمهور يتفرج عليها من بيته من غير قلق الإصابة بالمرض. والحل ده خلى الجمهور عنده رفاهية الفُرجة على أفلام جديدة وهو على سريره من غير ما يضطر يعمل أي مجهود.. فتخيلوا لما ينزل فيلم جديد وكمان من بطولة نيللي كريم وظافر العابدين مع بعض؟
نشرت إمبارح الفنانة نيللي كريم البوستر الرسمي لفيلمها الجديد “خط دم” بالإضافة لبرومو الفيلم، اللي هينزل على منصة “شاهد VIP” للجمهور يوم 30 من شهر أكتوبر ده، وهيكون تاني فيلم يُعرض عبر منصة رقمية بعد فيلم صاحب المقام للفنانة يسرا والفنان آسر ياسين، وخصوصًا بعد ما الكل حب الكيمياء اللي بين الثنائي في مسلسل تحت السيطرة، متوقعين نجاح ساحق للفيلم الجديد!
“خط دم” بينتمي لنوعية أفلام الرعب، وبتتمحور قصته حوالين مصاصين الدماء، ونادرًا لما بنشوف أفلام مصرية بتتناول النوع ده من الأعمال، وده اللي مخلي الكل مستني يشوف الفيلم وطريقة تناوله للموضوع هتبقى عاملة إزاي. وده كمان اللي كان مخلي نيللي كريم خايفة من الدور في الأول، ولكنها اتشجعت إنها تعمل دور جديد وتطلع للناس بشخصية مختلفة عن اللي اتعودت تقدمها في أعمالها اللي فاتت.