اتصدر هاشتاغ “قاطع ABC” مواقع التواصل الاجتماعي في لبنان، وده بعد ما طلب إدارة المجمع التجاري من أحد المتاجر فصل موظفة بتشتغل في المكان بسبب إنها محجبة!
وده وفقًا لمحادثة تم تسريبها بين إدارة المجمع (فرع منطقة الأشرفية في بيروت) والمتجر full house. اللي رفض طلب الفرع الرئيسي بفصل الموظفة. واحتج على القرار وقرر إنه يقفل المكان علشان مايبقاش مشارك في دعم أي عنصرية أو تعصب.
ووقتها نزلت ABC بيان بتقول فيه إن الشركة بتأكد إنها بتحترم كل الديانات والمذاهب وبتتعامل على أساس المساواة والوحدة بينهم. وللسبب ده فهي بتحافظ على عدم إبراز أي شعار ديني أو حزبي أو سياسي لأي فئة.
الناس اعتبرت البيان ده مستفز أكتر من اللي عملوه وقالوا قبل ما تأكدوا على احترام جميع الديانات، احترموا عقول الناس! وده بعد ما نشر أحد المتابعين لهم صورة من المكان وهو بيحتفل بعيد الكريسماس! وفي نفس الوقت المكان ده كان بيعمل إعلانات على الطرق شعارها “!Wear your identity” والناس اعتبرتهم منافقين، ازاي بتقولوا نعبر عن هويتنا وأنتم أصلًا مش بتحترموها وفي نفس الوقت بتحتفلوا بعيد ديانة تانية!
فين مبدأ المساواة؟ مش المفروض لو هيمنعوا أي حاجة تعتبر رمز ديني تبقى مطبقة لكل الأديان؟ ازاي بتنادي بالمساواة وعدم التمييز وأنت أصلًا ماعندكش ثقافة تقبل الآخر؟ هي دي العنصرية والمعايير المزدوجة بعينها! اللي اتعمل ده بينتهك المواثيق الدولية اللي بتكفل الحرية لأي شخص إنه يعبر عن نفسه ويمارس شعائره الدينية ويلبس اللي هو عايزه بكل حرية طالما مش بيأذي حد!