حل جديد هيسهل على المصريين في الخارج تحويل الفلوس لذويهم في مصر
كتير من المصريين في الخارج بيواجهوا مشكلة في تحويل الفلوس لأهاليهم وأصحابهم هنا في مصر، وده بسبب إن عمليات التحويل البنكية بتتطلب إن الطرفين يكون عندهم حساب بنكي، وده مش بيكون دايمًا حل عملي لشريحة كبيرة من الناس. ده غير إن في كتير من البنوك بتاخد وقت كبير عشان تنقل الفلوس من بلد للتاني، وفي حالة إن التحويل طارئ وفي نفس اليوم، الرسوم بتكون عادةً كتيرة، وعشان كده شركة موني جرام العالمية في تعاون مع التجاري وفا بنك إيجيبت قررت تقدم حل للمشاكل دي كلها.
موني جرام قررت توفر خدماتها لملايين من المستهلكين في السوق المصري، ودلوقتي يقدر المصريين في الخارج يبعتوا حوالاتهم المالية على مصر بسهولة، وهيقدر أهلهم يستلموها في نفس اللحظة من أي فرع من فروع بنك الوفا التجاري في الجمهورية من غير ما يكون عندهم حساب في البنك، وده بموجب آخر اتفاقية تعاون بين موني جرام والتجاري وفا بنك إيجيبت.
شركة موني جرام هي واحدة من أهم شركات العالم في مجال تحويل الأموال، وأنا شخصيًا استخدمتها أكتر من مرة في إرسال واستلام حوالات، ودايمًا بلاقيهم بيقدموا حلول مبتكرة وسهلة وذكية عشان يخلوا عملية التحويل سلسة، ويقدروا يوصلوا المصريين بذويهم في الخارج. والشركة عندها كذا اختيار لعملائها من أول الإنترنت والأبلكيشن على الموبايل، لحد أكشاك الدفع الآلي و الـ 350 ألف فرع المنتشرين في 200 دولة حوالين العالم.
أما عن التجاري وفا بنك إيجيبت، فمتقلقوش فروعه اللي عددهم 64 منتشرين في كل أنحاء الجمهورية، والتنوع ده بيدي فرصة لكل أهل مصر من العاصمة للمحافظات إنهم يقدروا يستلموا الحوالات المبعوتة ليهم بسهولة ومن غير قلق أو تعب.
وطبقًا لأحمد علي، الرئيس الإقليمي لموني جرام الشرق الأوسط، فالسوق المصري هو واحد من أهم الأسواق بالنسبة للشركة، وده لإن مصر بتيجي في الترتيب الخامس من حيث الدول الأكثر إستلامًا للحوالات المالية في العالم كله. وفي سنة 2018، السوق المصري شهد نمو بنسبة 17% في كم الحوالات المستلمة، وده دفع موني جرام إنها تواصل استثمارها في الاقتصاد المصري، اللي بلغ حوالي 29 مليار دولار.
وأكد الأستاذ علي إن موني جرام بتسعى لتعزيز وتوسعة تواجدها في الأسواق الأساسية حول العالم، وتعاون الشركة مع التجاري وفا بنك إيجيبت هيوفر بدائل للعملاء عشان يقدروا يوصلوا لمدخراتهم بشكل سهل ومستمر.
ومن الناحية التانية، هشام السفا، العضو المنتدب بالتجاري وفا بنك إيجيبت، طمن المصريين في تصريح وقال: “تأتي اتفاقية التعاون مع موني جرام ضمن مساعي التجاري وفا بنك إيجيبت الحريصة على دعم الشمول المالي. ستُمكن خدمة حوالات موني جرام الحاجة اليومية للمصرين العاملين بالخارج من إرسال الأموال لذويهم وأفراد عائلاتهم بطريقة آمنه يُعتمد عليها. نحن سعداء للمساهمة في تعزيز شبكة موني جرام للوصول لعملائها حول العالم”.
وعن تجربة شخصية، موني جرام دايمًا بتحاول إنها تطور من نفسها عشان خاطر العملاء بتوعها، وبتحاول تقدم قنوات متعددة ومتفصلة على حسب احتياجات المستخدم، فدلوقتي وبعد نجاح تطبيق الموبايل، الشركة فتحت اختيار الإيداع باستخدام بطاقات الإئتمان، مش بس كده ده كمان وفروا لكل مستهلك محفظته الرقمية الخاصة بيه.
ومؤخرًا، الشركة أعلنت عن شراكتين جداد واحدة مع شركة “ريبل”، اللي بتوفر خدمة إنجاز معاملات الدفع عن طريق تقنية “البلوك تشين”، وده عشان المستخدمين يقدروا يستفادوا من حل “السيولة عند الطلب” الخاص بالشركة، والتانية مع شركة “إكس رابيد” اللي بتقدم حل تسوية الدفعات للمستهلكين.