حلوان: ضرب زوجته 20 طعنة وقطع ودنها اليمين بسبب خلافات مادية
يوم السبت 18 يونيو، نشر موقع المصري اليوم خبر القبض على زوج في حلوان بتهمة توجيه 20 طعنة لزوجته في أماكن متفرقة من جسمها وقطع ودنها اليمين بسلاح أبيض. وحصلت الجريمة في منطقة المساكن الاقتصادية في حلوان.
وصلت الزوجة رنين حامد، 24 سنة، لمستشفى القصر العيني علشان تتعالج، وبعد القبض على المتهم أتوجهت قوات الأمن لاستجواب رنين في المستشفى، ولكن حالتها الصحية كانت لا تسمح بده.
كشفت تحقيقات النيابة إن الطعنات اللي اتوجهت للزوجة كانت متركزة في منطقة الأكتاف والبطن والطحال، ووضحت إن الضحية موجودة حاليًا في العناية المركزة بين الحياة والموت.
![](https://ar.scoopempire.com/wp-content/uploads/sites/4/2022/06/1646035_0-1.jpg)
ونشرت بوابة الأهرام نفس الخبر بإضافة إن الدافع وراء الجريمة كان خلافات أسرية، وفي السياق ده قال موقع الشروق نيوز إن الخلاف بين الزوجين كان بخصوص ماديات وإن المتهم محبوس حاليًا على ذمة التحقيق لمدة 4 أيام.
ووضح والد الزوجة في تحقيقات النيابة إن الزوج كان بيحاول يجبرها تنزل الشغل وهي حامل في الشهر السابع وعندها ابنهم التاني عمر اللي محتاج رعايتها، وقال إن بنته كان عندها محل كوافير ملكها قبل الجواز. وأضاف إنها متجوزة من 3 سنين وإن زوجها اتعدى عليها بالضرب قبل كده مرة واحدة.
وبخصوص الجريمة، قال والد الضحية إن الخناقة ما بين الزوجين بدأت من 9 بالليل لحد الساعة 12 بعد نص الليل، ووضح إن الزوج رفض محاولات تدخل والدته اللي ساكنة معاه في نفس العمارة، علشان يوقف تعذيب الزوجة، وأصاب والدته خلال تسديد الطعنات لزوجته.
وأضاف والد رنين خلال التحقيقات إن الزوج جاب سكينة من المطبخ وفضل يضربها بيها لحد ما وصل عدد الطعنات اللي نفذت من أجزاء مختلفة في جسمها لـ 20 طعنة، وحصل ده في الوقت اللي كانت بتحاول ترمي نفسها من بلكونة الشقة اللي في الدور الخامس علشان تهرب من التعذيب.