بعد غياب فترة كنا اتعودنا فيها على وجود ويجز في الساحة، من تراك لإعلان، وسنة 2020 كان مسيطر فيها، اختفى الفترة اللي فاتت شوية ورجعلنا بتراك جديد مع ببجي موبايل للاحتفال بالذكرى السنوية التالتة لببجي موبايل، بفيديو رسمي كمان، واسمه “حتتك بتتك” وانتشر على السوشيال ميديا والمشاهدات بتاعته لحد دلوقتي عدت 350 ألف في أول 15 ساعة بس، التراك بشكل مختلف عن اللي اتعودنا عليه من ويجز، وكمان الفيديو، وده خلانا نتحمس أكتر للاحتفالية اللي هتكون النهارده أونلاين للعبة.
الكلمات بتاعتها زيّ ما اتعودنا، لكن هل ده رد ويجز بعد فترة من الديسات في الراب سين وماكنش ويجز بيدخل فيها، ووقتها الناس كلها كانت بتسأل ليه مردش، تفتكروا ده الرد بعد فترة بتعاون كبير زيّ ده؟ قولولنا إيه رأيكم في التراك وشايفين ده رد على الراب سين كلها ولا ويجز بيشتغل وبيقدم فن بيحبه ومالوش دعوة باللي بيدور في الديسات؟
اللعبة تم إطلاقها بالنسخة العربية في ديسمبر 2018، كجزء من حرص اللعبة على إنها توصل لجمهورها بلغته المفضلة، ومن وقت إطلاقها رحب الجمهور بيها وبقت مكانتها بتتطور بسرعة للأقوى من خلال بطولات وفعاليات خاصة، بما فيهم “ببجي موبايل تحدي النجوم” اللي تم في المنطقة العربية.
