موضة الشتا بتتغير كل سنة، في الألوان والموديلات، لكن ملك اللبس الشتوي بلا منافس هو الجاكيت الجلد، مش بيحتاج مجهود كبير في تنسيقه ودايمًا بيدي شكل مميز في الآخر وشيك، وهو قطعة أساسية في دولابنا كلنا بنات أو ولاد، اللي بيختلف بقى ازاي ننسق عليه كذا طقم بشكل مختلف على أحدث موضة كل سنة، علشان كده هنساعدك تنسق الجاكيت الجلد بأكتر من طريقة للبنات والشباب.
على جينز بوي فريند
من أكتر الحاجات اللي بتغير شكل الطقم خالص لشكل كاجوال أكتر، البنطلون الجينز بستايل (boyfriend) وعليه لون أساسي زي الأبيض أو الأسود تحت الجاكيت، بكل سهولة هتلاقي الطقم مظبوط وشيك من غير ما تحتاجي تعملي مجهود كبير، كمان لو عليه هاف بوط أو بوط طويل هيغير شكل الطقم خالص ويبقى طقم شتوي شيك من اللي بنستنى الشتاء مخصوص علشانهم.
بنطلون كاروهات
على طريقة نجوم هوليوود، ممكن تنسق الجاكيت على بنطلون مخطط أو كاروهات، هيديلك في النهاية لوك كاجوال مختلف للجاكيت لإنه بيبقى (basic) وينفع تدخل عليه أي نقوشات أو كاروهات.
الجاكيت الجلد مع الفساتين
من الحاجات اللي طالعة موضة جدًا السنة دي الفساتين الصوف، فممكن تستغلي ده في إطلالة مختلفة مع الجاكيت، وكمان على أي فستان بأي شكل، الجاكيت الجلد هيضيفله شكل مميز سواء الفستان سادة أو منقوش، وكمان سواء كان صك من غير قصة محددة، أو له قصة أو فتحة، أيًا كان شكل الفستان فعلًا هيليق معاه الجاكيت الجلد.
بنطلون جلد
من أكتر الحاجات اللي طالعة موضة دلوقتي البنطلون الجلد، فممكن تستغلي ده وتلبسيه على الجاكيت ده، وماتخافيش مش هيبقى نفس فكرة ستايل حنفي الأبهة، الشكل في الآخر بيطلع شيك جدًا ومختلف عن لما تلبسي الجاكيت الجلد مع خامة تانية.
قميص وكرافت
بشكل مختلف، ممكن تلبس الجاكيت على قميص وكرافت، وممكن كمان تلبس عليهم بلوفر تحت الجاكيت، هيكوَن شكل مختلف وشيك، وهيكون تغيير عن ستايل الكلاسيك المعروف بقميص وكرافت مع بليزر عادي.،الجاكيت الجلد جديد ومختلف في الستايل ده وهيبقى بيدمج بين الكاجوال والكلاسيك.
الجاكيت الجلد يعتبر جوكر دولاب الشتا، مع إن سعره دلوقتي ممكن يدمر ميزانيتك، بس ماتقلقش، وأنت بتجيبه هتبقى بتكسب كذا ستايل بكذا شكل، وهيبقى حلال فيه الفلوس مش زي أي قطعة بتجيبها وممكن تنسقها بشكل أو اتنين بالكتير.