الحاجات اللي بتحصل في حياتنا يوميًا مش شرط تكون كلها على مزاجنا أو على هوانا، ومش شرط تكون كلها بتسعدنا، في أيام كتير بتعدي علينا صعبة وكلها تعب وضغط على المستوى النفسي والبدني، بس دايمًا لازم في كل الحاجات السلبية اللي ممكن تحصل لنا في اليوم ،إننا ندور على حاجات بسيطة اللي لو افتكرناها أو اتكلمنا عنها نلاقي في بسمة وضحكة بتترسم بشكل تلقائي على وشوشنا، الحاجات اللي بتهون تعب يوم طويل، حاولنا نجمع لكم شوية من الحاجات دي مع العلم إننا مش هنقدر نذكرها ولا نتكلم عليها كلها في مقال واحد!
- لما تلاقي فلوس في جيبك كنت ناسيها من السنة اللي فاتت.
- قعدة البلكونة في الفجرية مع كوباية شاي سخنة.
- نسمة هوا العصاري في يوم حر من أيام الصيف.
- لما تاكل أخر حتة بسكوتة في الأيس كريم.
- لما ترجع للبيت بعد يوم طويل ومتعب.
- أول لما تشوف البحر من بعيد بعد سكة سفر طويلة.
- لما طفل صغير يضحكلك في الشارع.
- لما تدخل الامتحان وتلاقي السؤال الوحيد اللي ذاكرته إجباري .
- يوم أجازة بعد أسبوع شغل طويل.
- ريحة المطر اللي بتملى الشوارع في كل شتا.
- لما تصحى من النوم وتفتكر إن عندك شغل ويطلع أجازة.
- لما تدخل البيت وتشم ريحة الأكل اللي بتحبها.
- لما تفكر في شخص وتلاقيه بيكلمك!
- خروجة أخر يوم امتحانات.
- لما تلاقي مكان فاضي تقعد فيه وأنت طالع المترو.
- القعدة قدام النيل مع كوباية حمص الشام.
- لما تلاقي أخر ازازة مياه ساقعة في التلاجة.
- لما الجول ييجي في أخر دقيقة!
- لما الحبهان مايطلعش من نصيبك في الأكل.
لما تركز في الحاجات دي هتلاقي بقى عندك طاقة إنك تكمل اليوم وتبدأ يوم جديد علشان تعيش نفس التفاصيل دي تاني!