مش حابين نكون إحنا اللي بنفكركم بالأخبار اللي مش حلوه، بس الاسبوع ده كان رسميًا آخر أسبوع في فصل الصيف وده معناه إن فصل الأجازات الطويلة والسفر هو كمان بيخلص. بس متقلقوش إحنا مش جايين ننكد عليكم وخلاص بالعكس! إحنا حاسين قد إيه في ناس كتير من الكبار هيزعلوا إنهم راجعين لحياة الشغل الروتينية، زي (ويمكن أكتر) من الأطفال اللي متضايقيين علشان هيرجعوا المدارس، وعلشان كده جبنالكم مجموعة من الأفكار اللي هتخليكم تتقبلوا رجوعكم للواقع بصدر رحب، وتكسروا الملل بطرق تانية غير إنكم تسافروا وتستمتعوا بالبحر.
جربوا أكلات جديدة
ممكن متفهموش إيه علاقة الأكل بالموضوع، بس فكروا كده لو كل ويك إند تاخدوا عيلتكم أو أصحابكم وتروحوا تجربوا أكل مختلف في مطعم جديد، وشوفوا على مقياس من 1 ل10، حماسكم للويك إند هيزيد قد ايه، 11 مثلًا؟ ومفيش أكتر من محلات الأكل اللي بتقدم أطباق من ثقافات وبلاد مختلفة، من اللبناني لحد الصيني والكوري وكمان اللاتيني!
حددوا يوم كل أسبوع تتفرجوا فيه علي فيلم مشفتهوش قبل كده
الواحد وهو تعبان في الشغل بيعيش فترة بتتراوح من 10 دقائق لربع ساعة من أحلام اليقظة الجميلة اللي بيتخيل نفسه فيها في أي مكان تاني إلا المكتب اللي هو قاعد عليه، وفي الأوقات دي بتحتاج أي فكرة تخرجك من روتين الشغل. وعلشان كده تخيل معايا بقى لو حددت يوم مُعين في وسط الأسبوع، ويُفضل في نصه زي يوم الثلاثاء مثلًا، وتتجمع مع أخواتك وعيلتك وتبقوا مجهزين حاجات تنقنقوا فيها زي الفشار أو اللب أو ناتشوز بالجبنة، وتشوفوا فيلم خفيف وجديد بالنسبة ليكم، حتى لو كان نزل من سنين، وتخلوها عادة عندكم. أعتقد إن حاجة زي دي هتبقى من الأفكار الحلوة اللي بتخفف عنكم، وتفصلكم في وسط الأسبوع.
اطلعوا مع أصحابكم لرحلة في الطريق
بعد أسبوع طويل في الشغل، هيكون شئ لطيف ومُختلف إنكم تطلعوا رحلة بالعربية على الطريق وتعملوا “road trip”. فمثلًا يوم الخميس بليل ممكن تعدوا تجيبوا أكلكم المفضل من أي مطعم وجبات سريعة، وتشغلوا أغاني وتاكلوا في العربية، وبعدين تسوقوا على طريق يكون فاضي وتفتحوا الشبابيك علشان تحسوا بنسمة الهواء الساقعة على وشكم. في أحلى من كده؟ دي حاجة سهل إنها تتعمل كل أسبوع وكمان مش مُكلفة!
خدوا أجازة من السوشيال ميديا
صدق أو لا تصدق، بس السوشيال ميديا من الأسباب اللي بتجيب اكتئاب وبتحسسكم بالرتابة والملل، لأنكم بتبدأوا تلعبوا لعبة المقارنة مع أي حد بتشوفوا صوره حتى لو كان ممثل أو ناس من الإنفلونسرز اللي إنتم متعرفوهمش بشكل شخصي. ولأن أكيد الكل بيحب يظهر نفسه في أحسن صورة، فبيعرض بس كل الحاجات الممتعة والجميلة اللي بيعملها على صفحته، أي حد تاني ممكن يحس إنه بالمقارنة بالشخص ده، حياته مملة. وعلشان كده لازم تفصلوا نفسكم فترة عن منصات السوشيال ميديا، وتحاولوا تستمتعوا بحاجات تانية تحسسكم بالإنجاز والسعادة زي إنكم تلعبوا ألعاب الكروت مع عيلتكم.. صدقوني بتفرق.
أسمعوا نوع أغاني جديد
الحاجات الصغيرة هي اللي بتعمل فروق كبيرة، لو عايزين تكسروا ملل الشغل، يبقي لازم تبدأوا من أصغر حاجة، من أول تغيير قائمة الأغاني اللي بتشغلوها الصبح في العربية وإنتم في طريقكم للشغل. ولو أنتم من الناس اللي بتحب الأغاني الكلاسيكية، أبدأوا أسمعوا مهرجانات أو العكس، أيوه أعملوا التغيير الكبير ده في نوع الأغاني، هتستغربوا وممكن متحبوش الموضوع في الأول، بس بعد فترة هتشوفوا الفرق في مستوي طاقتكم، وهتحسوا بمود مختلف.
أقرأوا أنواع كتب مختلفة عن ذوقكم
بعد الأغاني هتيجي الكتب، لو إنتم من الناس اللي مبتحبوش القراءة، جربوا تبدأوا بكتاب بسيط وصغير، وبعد كده هتلاحظوا الاختلاف اللي هتحسوا بيه. ولو إنتم من الناس اللي مدمنين كتب زيي، فابتدوا أقرأوا أنواع مختلفة عن اللي أنتم بتقرأوه وبتختاروه في الطبيعي. هتحسوا في الأول إن الموضوع مش لطيف، بس بعد كده هتكتشفوا كم الأنواع اللي أنتم طلعتوا بتحبوها، ومهتمين بيها وأنتم متعرفوش. ويا سلام بقى مع كوباية الشاي أو القهوة وأنتم بتقرأوا، شوفوا مزاجكم هيبقى رايق إزاي.
اكتبوا رسائل تقدير وحب للناس المقربين ليك
سواء كان مديركم في الشغل أو صاحبكم من الحضانة أو الأتنين، جهزوا قائمة بالناس اللي أنتم ممتنين لوجودهم في حياتكم وابعتوا على الأقل لشخص واحد كل أسبوع رسالة صغيرة بتبينوا فيها تقديركم وحبكم للشخص اللي بتكلموه. وبالشكل ده كل أسبوع هيبقى فيه حاجة حلوة بتستنوا تشوفوها، وهي فرحة الشخص اللي قدامكم لما يقرأ الرسالة دي.