جريمة بشعة هزت مصر اليومين اللي فاتوا، مش علشان طريقة القتل بس وعلشان عمرها كمان، واحدة عندها 15 سنة واجهت تفاصيل كلها رعب وخوف في لحظاتها الأخيرة قبل ما تفارق الحياة، وهي بيتم اغتصابها ودبحها وهي في عمرها ده!
الضحية أمل كان عندها 15 سنة لقوها في بيتها وهي جثة عارية مدبوحة في رقبتها وجرح تاني في بطنها. واللي قتلها وحاول يغتصبها هو ابن عمتها! وهو نفسه اللي بلغ أهلها عن الحادثة وكلم والد الضحية وبيقول له ” تعالى البيت بنتك مقتولة”! وعمل نفسه متفاجئ من اللي حصل وقعد يقول لأهلها “والله هجبلها حقها” وكان بيعيط بحرقة!
بس التحريات أثبتت إن هو اللي عمل كده، ولما اتقبض عليه حكى التفاصيل وإنها فتحت له وهي مأمنة له وكان مخبي سلاح أبيض بين هدومه. ولما قالها “اقلعي هدومك”! ورفضت، بدأ يحاول إنه يعتدي عليها وقرر إنه يقتلها علشان يخفي جريمته!
بس والدها كان مركب كاميرات لإن حصل محاولة سرقة قبل الحادثة، فركبها علشان يحمي بنته. لإنها معظم الوقت بتبقى لوحدها وهما في قرية هادية في محافظة الجيزة، لكن المتهم كان عارف ده وكسرها وشال الأسلاك منها. بس نسي أهم حاجة وهو الهارد اللي كان متسجل عليه لحظة دخوله وخروجه للعقار بعد ما دبحها. واللي ساعد تحريات النيابة هو إن في ست شافته بالصدفة كان بيحاول يخفي السكينة في الهدوم ورماها جانب شجرة بعد ما غسلها بالمياه والست دي أرشدتهم على مكان السكينة اللي ارتكب بها الجريمة.