ثلوج في السعودية: طقس بارد وسيول على مناطق مختلفة والحرارة تصل لـ 2 مئوية

مبقاش جديد علينا نسمع أخبار طقس غريبة ومش متعودين عليها، عن بلاد فكرتنا عن الطقس فيها ثابتة من يوم ما اتولدنا، وده بسبب تبعات تغير المناخ والاحتباس الحراري اللي بيعانيه العالم كله بلا استثناء، فلو تعرف عن طقس الخليج إنه حر وجاف، دلوقتي السعودية بيتساقط عليها ثلوج، وفي مناطق وصلت درجة الحرارة فيها لـ 2 درجة مئوية زي منطقة طريف، وفي صور لمناطق متصحرة أصبحت خضراء، إيه تفاصيل الطقس اللي بتتعرض له السعودية دلوقتي؟

تحذيرات وتوقعات المركز الوطني للأرصاد السعودي

عن: CNN

أعلن المركز الوطني للأرصاد الجوية في السعودية عن توقعات هطول أمطار رعدية من متوسطة لغزيرة، وتوقعت الأرصاد نشاط رياح واحتمال جريان سيول على أجزاء من مناطق القصيم، الرياض، الشرقية، الحدود الشمالية والجوف، وأصدر المركز الوطني للأرصاد بالسعودية تنبيهات جديدة بهطول أمطار متوسطة في مجملها على منطقة الرياض.

والنهارده الصبح، أصدر المركز الوطني للأرصاد السعودية خلال نظام الإنذار المبكر تنبيهات عن حالة الطقس المتوقعة خلال الساعات الجاية، في مناطق القصيم وتبوك ومكة المكرمة والشرقية والشمالية وحائل وجازان والجوف والرياض والباحة وعسير، بحسب صحيفة (سبق) السعودية.

تساقط الثلج

انتشر فيديو لسقوط الثلج في منطقة جبال اللوز في السعودية، والناس بتستمتع بالأجواء دي اللي اتعودوا عليها كل سنة في جبال اللوز.

مدير فرع المركز الوطني للأرصاد بالشمالية في السعودية فرحان العنزي، قال: “الهطول الثلجية في شمال المملكة -وخاصة (جبال اللوز) وما جاورها- تعتمد على عاملين أساسيين، الأول يتعلق بمدى تعمق ومسار تحرك المنخفض القطبي مع توفر رطوبة مناسبة، حيث إنه في الغالب يلامس المنطقة الشمالية الغربية (منطقة علقان وجبل اللوز)، وقد يتعمق أكثر جنوبًا ويؤثر على جبال (حسمى) غرب تبوك، ونادرًا ما يصل تأثيره إلى جنوب منطقة تبوك حيث جبال الحرة”.

الخضرة تكسو جبال مكة بعد أمطار غزيرة

من أول أسبوع في شهر يناير، حصل ظاهرة اعتبرها الناس غريبة، تساقطت أمطار غزيرة على جبال مكة المكرمة والمدينة، وظهرت خضرة وزرع رغم إن المنطقة بقالها سنين صحراء غاب عنها اللون الأخضر.

الناس بتستمتع بالجو اللي بشكل ما مش متعودين عليه بالشكل ده في المملكة، وبيحاولوا يتكيفوا مع الظواهر المناخية الجديدة ويستغلوها كمان في جذب السياح اللي مهتمين بالأجواء دي في فصول السنة.

في الوقت ده وفي ظل التغيرات غير المتوقعة في المناخ اللي بيشهدها العالم حاليًا، كل شيء وارد، لإننا شايفين في بلاد كان مفروض فيها برد شديد حصل فيها موجات حر، التغيير مش بيبقى معروف، وتأثيره ممكن يؤدي لجفاف وحرائق في بعض البلاد وبلاد تانية بتتعرض لفيضانات، التأثير عكسي بشكل كبير فالتوقعات مش دقيقة.

آخر كلمة: ماتفوتوش قراءة: لوحة فنية من الطبيعة: تساقط ثلوج على جبل اللوز في تبوك

تعليقات
Loading...