في وقت الناس بتحارب فيه علشان ترسي قواعد ومبادئ الإنسانية والحقوق، وعلشان كل شخص يعرف حقه وواجبه، والخطوط الحمراء اللي لازم يقف عندها، وبيتم المطالبة بقوانين علشان نمنع العنف بشكل عام ويبقى له حل رادع، وخصوصًا العنف ضد المرأة اللي بنواجهه في مجتمعنا..
وسط كل ده، ظهر حوالين العالم مصطلح جديد وهو ثقافة الإلغاء، اللي من خلالها المجتمع على السوشيال ميديا بتوجيهه الانتقاد لشخصيات أو أفعال معينة ممكن يؤدي إلى تأثير إيجابي في المجتمع..
بعد واقعة عروسة الإسماعيلية، ظهرت المذيعة ياسمين عز في برنامجها “كلام الناس” على قناة MBC مصر وقالت تصريحات أثارت غضب ناس كتير على السوشيال ميديا، لحد ما قامت حملة بتطالب بـ “إلغائها”.
مذيعة من المفروض إن يكون عندها الحد الأدنى من المهنية طلعت بررت العنف الأسري والعنف ضد المرأة، وشجعت الستات إنهم يسكتوا علشان المركب تمشي! ياسمين عز بتقضي على مسيرتها المهنية بدعمها للعنف.
يارتني كنت أطرشىت قبل ما أسمعها
Posted by Yeol Berry on Friday, February 18, 2022
من امبارح، وتريند رقم 1 على تويتر هو #أوقفوا_ياسمين_عز اللي طلعت في برنامجها بتعلق على واقعة عروسة الإسماعيلية اللي اتضربت علقة في وسط الشارع يوم فرحها، وبتقول عليها ست أصيلة علشان احتوت جوزها -اللي سحلها بفستان الفرح في الشارع- واحتوت غضبه وعدت الليلة وماخربتش بيتها!
الفيديو انتشر على السوشيال ميديا وانتشرت معاه دعوات لوقف المذيعة عن العمل والتحقيق معاها في تصريحاتها اللي بتبرر العنف، والناس كلها مستنيين رد فعل من نقابة الإعلاميين والجهات المختصة. لإن العنف مافيهوش وجهات نظر، ولإن تطبيع العنف جريمة ماتقلّش عن ارتكاب العنف نفسه، وللأسف ده اللي وصلنا لإننا نتكلم في بديهيات حقوق الإنسان في صون كرامته وإن ماحدش يعتدي عليه!
نناشد المجلس القومي للمرأة بالتحقيق مع المذيعة ياسمين عز بخصوص تصريحاتها المناصرة للعنف ضد المرأة في برنامج كلام الناس…
Posted by Women of Egypt – سيدات مصر on Friday, February 18, 2022
“ماتخربيش بيتك، استحملي علشان بيتك وولادك، الرجالة طبعها حامي واحنا كستات مفروض نحتويهم، ضل راجل ولا ضل حيطة” كل الكلام اللي للأسف بنسمعه من ناس في مجتمعنا وهو اللي وصلنا للجرائم اللي بنواجهها دلوقتي. مابنديش أعذار للناس اللي بتقول الكلام ده مهما كان، مابالك بمذيعة على قناة وليها صوت مسموع والناس بتشوفها! وبتختم كلامها بإنها ضد العنف ضد المرأة طبعًا، طبعا احنا ماعندناش شك في دي!
الحقيقة دي مش أول مرة المذيعة ياسمين عز تثير فيها الجدل، من أقل من أسبوع، انتشر ليها فيديو من برنامجها في حوار مع أسامة منير، وهي بتقول إن الست هدية الراجل وإنها ضد إن الستات تجيب هدايا للرجل. وإن جمالها كفاية عليه.. الفيديو فيه كمية كلام بيدل على اقتناعها بإن الست سلعة، الراجل يقدّر جمالها بهدية ألماظ.