كتير بنشوف ناس بتكتب على السوشيال ميديا بتدور على أدوية ناقصة في السوق ومش لاقيينها وبيطلبوا من أي حد يلاقيها يتواصل معاهم، وده بيتكرر كتير ولأمراض مختلفة، علشان كده هيئة الدواء المصرية بتقدم خدمة “توافر” للبحث عن الأودية الناقصة في الأسواق.
بتدخل على هيئة الدواء المصرية وتملى استمارة ببيانات وتفاصيل الدواء اللي بتدور عليه، وهيتم التواصل معاك بأماكن الصيدليات اللي متوفر فيها الدواء اللي بتدور عليه، الخدمة متاحة لكل المواطنين للاستفسار عن مدى توفر المستحضرات الدوائية في السوق المصري.
تقدر تستفيد بالخدمة أونلاين عن طريق الموقع الرسمي لهيئة الدواء المصرية، أو تتصل على الخط الساخن 15301، وفي الحالتين هيتم التواصل معاك في أقرب وقت ممكن، والخدمة بيتم فيها التعامل مع البلاغات الواردة بسرية تامة، وبتكون محمية بشكل كامل من هيئة الدواء المصرية، بما فيها بيانات المستفسر، ومش هيتم الافصاح عنها تحت أي ظرف من الظروف.
خدمة “توافر” بيتم تحديثها بشكل دوري، علشان تكون بمعلومات دقيقة وصحيحة أول بأول وتفيد المستخدمين بأماكن توفر الدواء بالفعل.