تحت شعار “تنفس” أطلقت السعودية برنامج سياحي جديد لموسم الصيف الحالي، والبرنامج ده هيستمر من 26 يونيو لـ 30 سبتمبر 2020، وبيتضمن خطة للسياحة الداخلية لـ 10 وجهات مختلفة جوا المملكة. موسم صيف السعودية متحدد ليه إجراءات احترازية مشددة، والإجراءات دي هتضمن ترفيه وسلامة المواطنين اللي بقالهم شهور مُقيمين في بيوتهم بسبب الإجراءات الوقائية اللي كانت مطبقاها المملكة لمنع تفشي فيروس الكورونا.
الهدف من الموسم ده هو السماح بخروج كل أفراد العيلة واستمتاعهم بالتنوع المناخي والطبيعة الساحرة اللي موجودة في السعودية، وده طبعاً بالإضافة للجانب التاريخي والثقافي للمواقع السياحية المختلفة في المملكة اللي كان في كتير منها مجهول بالنسبة للمواطنين والمقيمين قبل الأزمة الحالية اللي حصرت تحركات الكل في مناطق محدودة. فالسعودية، وفقاً لوزير السياحة السعودي أحمد الخطيب، فيها 10 ألاف موقع آثري، وخمسة ألاف موقع منهم متسجل بشكل رسمي في اليونسكو، وبالإضافة للأهداف الترفيهية، الموسم السياحي ده هيساهم في خلق وظائف جديدة ونمو الناتج المحلي بعد شهور من الركود.
الوجهات السياحية للموسم ده متوزعة حول المملكة بحيث تغطي معظم مناطق الجذب السياحي من أول الرياض لحد المنطقة الشرقية، ففي رحلات مثلاً لمدينة تبوك في شمال السعودية اللي بتضم مجموعة من الأودية والمناطق الرملية والتشكيلات الصغرية الغريبة، وفي كمان مدينتي أملج وينبع اللي مليانين بالشواطئ الساحرة والهادئة، ومدينة الملك عبد الله الاقتصادية اللي فيها أنشطة وفاعليات ترفيهية متنوعة، ومدينة جدة الجميلة واللي مليانة بمعالم تاريخية، وفي كمان سلسلة جبال السروات في الطريق للطائف اللي بيسموه مصيف العرب، وده بالإضافة للقرى التاريخية في الباحة والغابات الكثيفة هناك، ومرتفعات عسير، وقمم جبال مدينة أبها الغنية بالتراث والثقافة والفنون.
القطاع الخاص هو اللي هيتولى قيادة موسم صيف السعودية السنة دي، وده وفقاً لتسهيلات وضوابط القطاع الحكومي اللي بيدعم الموسم بكل الطرق المتاحة ليه، وكل اللي حابين يستمتعوا بعروض ورحلات الموسم ده يقدروا يعرفوا كل تفاصيله من الأبليكيشن أو الموقع الالكتروني روح السعودية أو visitsaudi.com اللي بيضم كل الباقات والعروض الخاصة بالموسم.