رنا بدر الدين واحدة من أبرز أصوات مغنيين الراب في السودان، عثروا على جثتها في واحدة من الشقق في الخرطوم وسط حالة من الغموض حول سبب الوفاة، والطريقة اللي حصلت بها الواقعة.
الحكاية بدأت بعد ما الشرطة تلقت بلاغ من أحد المواطنين بيفيد عثوره على جثة لفتاة داخل واحدة من شقق العمارة اللي ساكن فيها بحي الأملاك في الخرطوم، وبعدها الشرطة انتقلت لمكان الحادث واتضح إن المكان عبارة عن شقة مفروشة بشارع البلدية وجثة بنت في العشرينات ملقاة على الأرض، وبيسيل منها الدم بشكل غريب، ولقوا أثار اعتداء ظاهري في منطقة الوجه وبتنبعث منه رائحة غير محببة والوجه منفخ، ولقوا إنه في بداية مرحلة التحلل.
بعد المعاينة الأولية، الشرطة كلفت فريق مختص بتصوير ورفع البصمات وجمع المخلفات من مسرح الجريمة، ورفعت الجثمان لقسم الشرطة لتكملة الإجراءات القانونية، قبل إحالته للتشريح لمعرفة أسباب الوفاة.
كشفت الشرطة السودانية عن تفاصيل الحادثة وصرحت إنها ماتت “مقتولة” في شقة مفروشة في الخرطوم، بعد تعرضها للضرب بآلة صلبة.
التحريات وصلت لإيه؟
الشرطة بدورها استجوبت الشاكي اللي بلغ عن الموضوع، واللي ذكر إن العماره كلها ملكه، وإن الشقة اللي حصل فيها الجريمة مخصصة لابنه “26 سنة” غير المتزوج، وإنه من أيام قليلة ابنه أجر الشقة لبنتين، وواحدة منهم سابت المكان والتانية فضلت، وقال كمان إن ابنه هو اللي بلغه بانبعاث رائحة كريهة ودماء سائلة من داخل الشقة.
الشرطة شكت في كلام الأب واعتبرته مش كفاية، وحققت مع ابن الراجل اللي هو صاحب الشقة، وبعد أقواله الشرطة اتأكدت من ظنها، وألقت القبض عليه وعلى شخص تاني “طالب” بيشتغل سائق توكتوك في حي كوبر في الخرطوم.
اعترافات ابن صاحب العقار
اعترف ابن المستشار صاحب العقار إن الحادثة المأساوية حصلت السبت اللي فات 17 ديسمبر، وده يأكد ليه لقوا الجثة في بداية تحلل، وكمل اعترافه وقال إن الحادثة حصلت بعد ما بدأت بمشادة كلامية حادة بينه وبين المجني عليها مطربة الراب رنا بدر الدين، وقال إنها أساءت له بألفاظ نابية واستفزته، فضربها بقطعة خشب في وجهها ورأسها، وقال إنه شغل جهاز التكييف وقفل الشقة عليها، واستعان بالمتهم التاني، سواق التوكتوك، علشان يساعده يتخلص من الجثة.
بعد انتشار الخبر، حالة من الغضب والاستياء أصابت السوشيال ميديا في السودان، وافتكروا ذكريات لهم مع الضحية، واعتبروا إن ده شكل من أشكال العنف الذكوري وممارسة السلطة لأي شخص يخرج برا الأعراف المجتمعية، لإن القاتل قدم أتفه سبب علشانه قرر إنه ينهي حياة شخص، وفي ناس تانية كانت رافضة للفن اللي بتقدمه شمتت في موتها وقالت “أخبار تفتح النفس” واللي استقبله بعض الناس وقالوا عليه “نموذج مصغر لداعش”.
الضحية رنا بدر الدين ظهرت لأول مرة على شاشات التلفزيون في 2011، على قنوات محلية سودانية كأول ظهور رسمي لمغنية لفن الراب السوداني، قدمت لون جديد اتعمدت تدمج فيه أساليب الموسيقى التقليدية التراثية والحديثة، وكان لها أعمال مقدمة على اليوتيوب.