من وقت جائحة كورونا، وحاجات كتير في نظام حياتنا شكلها اتغير واتحولت من حاجات غريبة ماجربنهاش قبل كده لنظام وأسلوب حياة، ومنها لعب الرياضة والجيم، لإن في وقتها كل النوادي الرياضية قفلت وماباقاش قدامنا غير الإنترنت، فاتخلق عندنا ثقافة جديدة وهي لعب الرياضة من البيت، زيّ الدراسة والامتحانات ما كانوا في البيت برضه.
والموضوع ده لسه ماتغيرش ولسه في ناس بتفضل إنها تخلص كل حاجة من البيت، واحنا شوفنا إن ده الوقت المناسب اللي نتكلم فيه عن تطبيقات رياضية تقدم لك برامج وتمارين وأنظمة غذائية تغنيك عن مشوار الجيم، وخصوصًا إننا خلاص بنستقبل الشتا وداخلين على السقعة والتكتكة.
FitOn
التطبيق بيقدم لك تمارين رياضية بناءً على الوقت اللي عندك ومستوى الصعوبة اللي أنت عايزها، أو نوع التمرين اللي عايز تعمله، ولو بتلبس جهاز لمراقبة معدل ضربات القلب في وقت التمرين، هتقدر تشوف معدل ضربات قلبك على الشاشة، والتطبيق عايز يزود عندك حتة المنافسة حتى لو أنت قاعد في البيت ويعيشك في جو الجيم، فتقدر تنافس اللاعبين التانيين اللي بيستخدموا التطبيق بشكل مباشر وأنت بتلعب، في إصدار مجاني من التطبيق عليه كل التمارين في مقاطع فيديو، ولو عايز حاجة زيادة زيّ التخطيط للوجبات الصحية، فممكن تشترك علشان الخدمة دي.
التطبيق مجاني لمستخدمين الأيفون والأيباد، ولأجهزة الأندرويد في جوجل بلاي، وفي إصدار كمان للويب.
Home Workout
واحد من التطبيقات اللي أخدت تقييمات عالية من مستخدمين التطبيق، التطبيق بيعتمد على فكرة التحديات وكل واحد منهم له مدة، في تحدي الأربع أسابيع وفي تحدي الـ 10 أسابيع، بيتميز بواجهة منظمة ومرتبة بتختلف عن باقي التطبيقات حتى في تصميمات الأيام والأسابيع، وتقدر تختار الخطة التدريبية من بين المعروضين، وتقدر كمان تركز على مناطق معينة في الجسم أو الجسم كله، وتختار كمان مستوى التدريب اللي عايز تبدأ فيه حسب التعليمات والإرشادات، التطبيق مجاني ومتوفر على جوجل بلاي وأيفون.
الكوتش
تطبيق مجاني بيعملك برنامج متكامل بناءً على هدفك، وبتدخل في الأول معلومات عن جسمك ونسبة الدهون علشان يتعرف احتياجاتك إيه، وبيتيح لك كمان إنك تختار الأكل اللي أنت بتحبه وعلى أساسه يحدد لك الوجبة، وبعدين بتقوله على المكان اللي هتتمرن فيه وتقوله على المعدات المتاحة عندك، ولو مافيش معدات بيقدر يسستم نفسه، وبيسأل كمان عن مستواك علشان يقدر يحدد لك البرنامج.
وفيه ميزة كمان إنه بيشتغل من غير إنترنت فتقدر في أي مكان تستخدمه، وبيوفر لك كمان متابعة يومية مع مدربين متخصصين، تقدر تعرف تفاصيل أكتر من على موقعهم من هنا.
Nike Training Club
ظهر في وقت كورونا بعد ما قفلت كل النوادي الرياضية، اتعمل علشان يبقى بمثابة مدرب شخصي ليك، التمارين فيه اختاروها بعناية، أكتر من 180 نوع، بداية من تمارين التحمل والقوة لتمارين اليوجا والتأمل وشد الانتباه، كمان التطبيق يقدر يتابع نشاطك اليومي ويوجهك بتمارين معينة مناسبة لك، لإنه عنده مستويات للمبتدئين والمتوسطين بجانب المحترفين، يعني هتلاقي الصعب والسهل والمتوسط، بجانب إنك هتلاقي مجموعة من المدربين العالميين بيقدموا نصايح.
Fit Radio
جربت تسمع موسيقى وأنت بتلعب رياضة؟ التطبيق ده موجه للناس اللي بتحب تعمل أجواء شبه أجواء الجيم علشان تحفز نفسها، هتلاقي مع كل تمرين ملفات مخصصة للموسيقى، وتقدر كمان تختار أنت نوع الموسيقى اللي بتتناسب مع إيقاعك أو نوع التمرين، وبيتيح لك كمان ميزة إنك تدمج ملفات الموسيقى اللي أنت عايزها، التطبيق متاح بشكل مجاني لمستخدمين أندرويد وأيفون وأيباد، وفي إصدار كمان للويب وتقدر توصل لهم من هنا.