توفي صباح اليوم التلات، المحامي المصري المعروف فريد الديب عن عمر 79 سنة، بعد صراع طويل مع مرض اللوكيميا، سرطان الدم، وده اللي أكدته بنته المذيعة حنان الديب، وقالت إن جثمان والدها هيتشيع من مسجد السيدة زينب في وسط البلد بعد صلاة الضهر، وهيتدفن في مدافن العيلة في مدينة السادس من أكتوبر.
اتولد الديب سنة 1943 واتخرج من كلية الحقوق سنة 1963، واتعين وكيل للنيابة العامة لحد سنة 1969، وفي السنة دي تمت إقالته في الحادث المعروف إعلاميًا بـ “مذبحة القضاة”.
اتقدمت أسرة الرئيس المصري السابق محمد حسني مبارك، بخالص العزاء في وفاة المحامي فريد الديب، وقال علاء مبارك في منشور على صفحته الخاصة على تويتر: “إنا لله وإنا إليه راجعون؛ نتقدم بخالص العزاء و المواساة في وفاة الأستاذ فريد الديب سائلين المولى عز وجل أن يتقبل الفقيد بواسع رحمته ومغفرته وأن يلهم أهله الصبر والسلوان، لا ننسى وقفه الرجل مع الأسرة في وقت انسحب فية الآخرون، ربنا يرحمه”.
تاريخ فريد الديب مع القضايا المثيرة للجدل
اتولى الديب مهمة الدفاع عن الرئيس السابق محمد حسني مبارك وعيلته، بعد ثورة يناير 2011، واللي تم اتهام مبارك فيها بتلات قضايا؛ هي الاشتراك في قتل متظاهرين ثورة يناير، وتلقي هدايا من الشركة اللي بيمثلها رجل الأعمال حسين سالم، والاشتراك مع وزير البترول الأسبق في تصدير الغاز لإسرائيل بأسعار رخيصة. قدر الديب ياخد احكام براءة لمبارك من تهمة قتل المتظاهرين وتصدير الغاز لإسرائيل والفساد المالي.
وفي 2016 وبعد ترافعه في قضية عائلة مبارك، اللي اتعرفت وقتها بـ “قضية القرن”، ظهر فريد الديب الإعلامية مع جيزال خوري على شبكة “BBC عربي” وقال الديب: “لازم الناس تفهم يعني إيه مهنة المحاماة صح.. هو أنا لما أترافع في قضية قتل يبقى أنا القاتل! لما أترافع في قضية سرقة يبقى أنا الحرامي! لما أترافع في قضية تجسس يبقى أنا الجاسوس!”.
ووضح إنه بيؤدي واجبه من غير ما يكون ملزم يفوز في كل القضايا اللي قرر الترافع فيها، ووضح إنه مش بيحضر جلسات النطق بالحكم في أغلب الأحيان، وإن دوره بينتهي عند المرافعة.
الجدير بالذكر إن في 2018 علق الديب على تقرير لقناة الـ “BBC“، قال إن الرئيس الأسبق حسني مبارك، كان متضايق من الـ “BBC” لدرجة إنه رفض دعوة رسمية لزيارة لندن سنة 1984، وقال الديب: “ناس بتخرف وبتهلوس تحت عنوان زائف.. سرية إيه! كلام فارغ كله.. يقولوا اللى عايزين يقولوه.. بقى رئيس دولة يرفض زيارة دولة عشان محطة إذاعة”.
حبيب العادلي: غرامة 500 جنية في تهمة الاستيلاء على أموال الداخلية
أخد الديب حكم براءة لوزير الداخلية السابق حبيب العادلي، من تهمة الاستيلاء على أموال وزارة الداخلية، وحكمت المحكمة على العادلي بغرامة قدرها 500 جنيه، ورفضت محكمة النقض طعن النيابة على الحكم.
وماكانتش دي القضية الوحيدة اللي اترافع فيها “الديب” عن حبيب العادلي، ولكن اترافع عنه في قضايا تانية وقدر يجيب له البراءة في كل التهم المنسوبة له، وقدر كمان يرفع الحظر عن ممتلكاته.
“الديب” يدافع عن الجاسوس الإسرائيلي عزام عزام
من أكتر القضايا المثيرة للجدل اللي اترافع فيها الديب كانت قضية الجاسوس الإسرائيلي عزام متعب عزام، اللي تم القبض عليه سنة 1996، خلال زيارته لمصر، وتم اتهامه بالتجسس لصالح إسرائيل.
رغم الغضب الشعبي اللي أحاط بموقف الديب بعد إعلانه الدفاع عن الجاسوس، إلا إنه استمر في مهمة الدفاع، واللي انتهى بخسارة الديب واتحكم على عزام بالسجن 15 سنة، قال الديب بعد كده في حوار صحفي، إنه دافع عنه بأوامر من الرئيس مبارك.
تخفيف حكم هشام طلعت مصطفى
دافع الديب عن رجل الأعمال المشهور هشام طلعت مصطفى، بعد ما تم اتهامه بالتحريض على قتل الفنانة اللبنانية سوزان تميم، وبعد ما صدر حكم بإعدامه، قدر الديب يخفف الحكم للجسن المشدد 15 سنة.
حسن راتب وقضية الإتجار بالآثار: آخر قضايا قريد الديب
من آخر القضايا المثيرة للجدل اللي اترافع فيها فريد الديب، في قضية رجل الأعمال، حسن راتب، اللي تم اتهامه في قضية الإتجار بالآثار، وقال الديب خلال واحدة من جلسات القضية إنه مريض بالسرطان، وإنها هتكون آخر قضية يترافع فيها أمام الجنايات.
قال الديب: “أنا قربت على 80 سنة وكترت عليا الأمراض بين سرطان دم وغيرها، أنا اشتغلت 60 سنة في السلك القضائي، والشغل في المحاماة، وخلاص هعتزل العمل العام”.
رجع الديب بعد كده وقال في تصريحات إنه ماعتزلش العمل كمحامي، ولكنه مش هيترافع أمام محاكم الجنايات مرة تانية، وأضاف: “ماقلتش إني ناوي أعتزل، لكن قلت إني مش هترافع أمام محاكم الجنايات مرة تانية”.
جدلية الدفاع عن قاتل نيرة أشرف
بعد ما شغلت قضية قتل نيرة أشرف أمام بوابة جامعة المنصورة الرأي العام المصري، أكد فريد الديب إنه قبل بشكل مبدئي تولي مهمة الدفاع عن المتهم، محمد عادل، أمام محكمة النقض، وزيّ العادة أثار الديب الجدل في الشارع المصري بقضية جديدة قرر يدافع عنها.
وقال الديب بعدها إن بيان القاضي -اللي تضمن إدانة المتهم- صدر قبل النطق بالحكم على المتهم بإجماع الآراء، وأكد إنه هيقدم مذكرة الطعن بالنقض في الحكم على القاتل.
اتقابلت تصريحات الديب بردود فعل غاضبة من الشارع المصري، اللي ظهرت بشكل واضح على السوشيال ميديا، وكان في جزء كبير من رودود الفعل دي بتهاجم الديب نفسه، وبالتالي رد الديب وقال: “أنا مش بدافع عن جريمة، أنا بدافع عن واحد متهم بارتكاب جريمة، وفي فرق كبير بينهم، ووظيفتي العمل على تطبيق صحيح القانون، ومجابهة عدم تطبيق أحكامه بشكل صحيح على المتهمين في القضايا المختلفة”.
وأضاف الديب: “دا شغلي وحرصي عليه، ومش إرضاء الرأي العام، كتير من القضايا اللي اتوليت العمل فيها كانت ضد آراء ورغبات الرأي العام، بس أنا مايهمنيش ده قد ما يهمني أطبق مهام عملي ووظيفتي”.