في تصريحات للرئيس عبدالفتاح السيسي رئيس الجمهورية، حذر فيها من الموجة التالتة من فيروس كورونا لتنبيه المواطنين لعدم التراخي والالتزام بالإجراءات الاحترازية. وكمان قال الدكتور محمد عوض تاج الدين مستشار الرئيس لشئون الصحة والوقاية إن بيتم متابعة الأوضاع واللي بيحصل في الدول الخارجية من تغيرات أو تحورات للفيروس، وإن مش بعيد أبدًا إن الموجة التالتة توصل لمصر، فتوقعت اللجنة العلمية لمكافحة الفيروس إن من المتوقع دخول الموجة التالتة خلال شهر أبريل واللي هيتزامن مع دخول شهر رمضان، ومن المتوقع ارتفاع عدد حالات الإصابة بالفيروس خلال شهر أبريل ومايو.
وعلشان كده بيتم التخطيط من دلوقتي لمحاولة تفادي زيادة أعداد الإصابات بالمرض، زيّ منع موائد الرحمن خلال شهر رمضان ونصيحة المواطنين بعدم التكدس والتقليل من العزومات لإن ده أكيد هيزود من احتمالية انتشار الفيروس.. ولازم كمان نوعي بعض بعدم التراخي في تطبيق الإجراءات الاحترازية علشان تمر الموجة التالتة بسلام.. أما بالنسبة لصلاة التراويح فلسه مش مؤكد لو هتتم في المساجد ولا هتضطر الحكومة إنها تاخد إجراء مختلف في حالة زيادة عدد المصابين بكورونا.
من المهم جدًا إننا ناخد الموضوع على محمل الجد ونتبع النصائح دي علشان نحمي نفسنا وغيرنا من المرض وعلشان نساعد في التقليل من أعداد المصابين والرجوع تدريجيًا لحياتنا الطبيعية.