“تحدي يوليو الأخضر” أو “July Green Challenge” هو مبادرة جديدة على إنتسجرام إتجمعت فيها كذا حركة وشركة منهمWeCare – Eco Solutions وGreenish وVeryNile وDawar App وGo Clean في محاولة لنشر الوعي والتشجيع على تغيير المفاهيم المضرة بالبيئة واستبدالها بعادات مفيدة للمجتمع والطبيعة.
التحدي بيشجع المشاركين فيه على فصل النفايات في البيت قبل التخلص منها لأربع فئات: بلاستيك، وورق ومعدن وبقايا عضوية. وبالرغم من بساطة العادة دي، إلا إن تأثيرها الإيجابي على البيئة ملوش وصف. فصل النفايات بيساعد في سهولة إعادة التدوير وبيمنع كمية كبيرة من المخلفات البلاستيكية من إنها توصل للشاطئ وتؤذي الكائنات البحرية أو إنها تدخل سلسلة الغذاء وتوصل لينا؛ كمان فصل النفايات بيسهل عمل جامعي القمامة وبيقلل من انتشار الأمراض.
تقدروا تشاركوا في التحدي عن طريق الخطوات الموجودة في البوست ده:
أدوات كتيرة بنستخدمها كل يوم زيّ الأكياس والكوبايات البلاستيكية تأثيرها على البيئة ممكن يكون كارثي. البلاستيك من المواد اللي مش بتتحلل في البيئة بسهولة، وممكن شنطة بلاستيكية تقعد ملايين السنين عشان تبدأ تتحلل، وبالتالي ممكن تتسبب في موت حيوانات كتير منها السلاحف والطيور البحرية.
عادات إيجابية زيّ فصل النفايات من الممكن تساهم في تجنب مشكلات كتيرة زي دي، وكمان هي وسيلة نتأكد بيها إن البلاستيك في طريقة عشان يتم إعادة تدويره، بدل ما ينتهي المطاف بيه في البيئة ويساهم في تدهور الحياة البرية.
عادات إيجابية تانية المنصات دي بتشجع عليها عشان نقلل تأثيرنا السبلي على البيئة منها استخدام شنط وكوبايات ممكن يتم إعادة استخدامها.