وزارة البترول دعت لتحديث التطبيق الإلكتروني Mop Stations اللي بيحددلك أماكن محطات الوقود المتاحة في كل المناطق، علشان يسهل استخدام التكنولوجيا في خدمة المستهلكين، وعلشان تعرف أقرب محطة بنزين ليك في أي مكان، وبعد تصريحات وزير البترول والثروة المعدنية المهندس طارق الملا، عن زيادة محطات تموين السيارات، داخل المحافظات أو على الطرق السريعة.
لنسهيل تقديم الخدمة للمواطنين في كل مكان، سواء كنت جوا أي محافظة في مصر، أو حتى على طريق سريع، هتقدر تعرف أماكن محطات البنزين اللي حوليك بدقة من خلال الأبلكيشن، وهيتم تحديثه وإضافة المحطات الجديدة اللي تم دخولها الخدمة حديثًا، وغير إنك هتقدر تعرف موقع أقرب محطة ليك، الأبلكيشن كمان هيخليك تعرف نوع الوقود المتوفر في المحطة، سواء بنزين وسولار أو غاز طبيعى أو شحن بالكهرباء.
الوزارة بتشتغل على تطبيق خطة لزيادة عدد محطات تموين السيارات في كل مكان، ده غير الاتجاه اللي بتسعى له الوزارة في إن المحطات تكون متكاملة الخدمات، علشان تقدم كل أنواع الوقود، سواء البنزين بأنواعه، والغاز الطبيعي، وتوفير وحدات للشحن الكهربائي، علشان يسهل على المواطن إنه يلاقي المناسب له في كل المحطات ومايضطرش يلف كتير.
أبلكيشن Mop Stations متوفر لكل الـ smart phones، على Google Play وApp Store.