بنت على تيك توك بتهاجم صورة الصعايدة النمطية في الدراما المصرية

انتشر فيديو على التيك توك لبنت صعيدية اسمها مايفول ناجح، بتهاجم فيه الكليشيهات اللي بتظهر الصعايدة في الدراما المصرية بطريقة نمطية.

@maivolnageh

#ramdan #مسلسلات_رمضان

♬ original sound – Maivol Nageh

وسألت مايفول، ليه صُناع الدراما مُصرين يطلعوا الصعايدة متخلفين وبيتكلموا بصورة نمطية؟ وطلبت منهم يروحوا يعيشوا وسط الصعايدة يومين ويشوفوهم عايشين ازاي.

وهاجمت في مسلسل (ضرب نار) بطولة الفنان أحمد العوضي، ظهور صقر على كتفه وهو سايق موتوسيكل، وقالت إنها عمرها ما شافت حاجة كده في حياتها. وشارك رجل الأعمال المصري نجيب ساويرس فيديو مايفول، مع تعليق “فخر الصعايدة”.

اتكلمنا مع أحمد من الصعيد، وسألناه عن رأيه في الفيديو وقال: “هو طبعًا في نمطية وكليشيهات مبالغ فيها عن الصعايدة في المسلسلات، بس الحق يتقال إن الكليشيهات دي مش جاية من فراغ برضه، الصعايدة عندهم حاجات مختلفة عن سكان بحري”.

بيضيف أحمد: “يعني أنا مثلًا أختي متجوزة في سوهاج، ولما حماتها بتتخانق مع حماها بتجري وراه بالبندقة في الشارع وبتبقي مصيبة”.

أما تغريد فبتقول: “أنا من المنيا، وأهلي كانوا عاملين قعدة عرب علشان يحلوا أزمة تار، وبعد ما الموضوع اتحل، وزعوا على الناس ملبس”.

أخيرًا، رغم إن صورة الصعايدة في المسلسلات بتيجي نمطية، فعادات وتقاليد الصعايدة وأسلوب حياتهم ممكن يكون مفاجئ لناس كتير في شمال مصر.

آخر كلمة: ماتفوتوش قراءة: جدل وإساءات وتشكيك في مصداقية البرنامج: ليه الناس لسه بتشوف رامز جلال؟

تعليقات
Loading...