بعد أكتر من أربع سنين في المحاكم، وبين تقديم طعن على الحكم وقبوله في مرات أو عدم قبوله في مرات تانية، تم تأييد الحكم بالإعدام على ابن الفنان المرسي أبو العباس، بعد ما خنق بناته وزوجته بسبب مروره بأزمة مالية.
المتهم قدم بلاغ إنه بعد ما رجع من ماتش روسيا ومصر، لقى جثث أسرته كلها مخنوقين في البيت ومرميين كل واحدة في مكان ومبلغ 340 ألف جنيه مسروق من الدولاب، بس التحريات اكتشفت عكس كده، بعد شهادة الشهود “حارس العقار” اللي أثبت إن مافيش أي حد غريب دخل أو خرج من شقته وقت الماتش وبالتحديد من الساعة 8 بليل لحد الساعة 2 الصبح. وبعد الضغط على المتهم وبعد ما فريق البحث الجنائي لاحظ خدوش على إيده، اعترف إن هو اللي ارتكب الواقعة. وبعدها أخدته النيابة العامة علشان يمثل الواقعة في مسرح الجريمة ويشوفوا ازاي ارتكب جريمته البشعة.
زوجته هبة، 39 سنة، وبنته جنة الله، 14 سنة، وحبيبة، 11 سنة، واحدة اتخنقت بسلك التيلفون والتانية بالمخدة والتالتة بإيشارب بعد مقاومة وتوسل منهم على إيد الشخص اللي المفروض يبقى مصدر أمانهم وحمايتهم .. والدهم اللي قتلهم وبعدين نزل يتفرج على الماتش.
السبب اللي قاله المتهم واللي دافع به عن جريمته البشعة، إنه كان بيمر بأزمة مالية اتسببت في خسارته لكل ثروته، فخاف عليهم من الفقر وعلشان كده قتلهم! طب هو المفروض أي أب أو أي أم يعجزوا عن دورهم تجاه ولادهم يبقى حلهم الأول والأسهل إنهم ينهوا حياتهم؟
طب لو الموضوع له شق نفسي وإنه ممكن يكون كان بيعاني من اضطرابات نفسية زيّ ما قال وإنه كان بياخد أدوية نفسية من خمس سنين، مع إن ده برضه مايعفهوش من جريمته، ليه أصلًا بنتجوز طالما مش عارفين نشيل مسئولية أسرة ولا عارفين نحميها؟ ليه بنتجوز لو احنا لسه بنعافر مع الحياة؟ ليه بنتجوز لو احنا مقررين من البداية إننا مش هنكمل؟ ليه بنجيب أطفال طالما احنا مش عايزينهم أصلًا، وبعد كده نقتلهم علشان مش عارفين نصرف عليهم؟
في الحقيقة إن الدافع ورا كل جرايم القتل دي أكيد أكبر من مجرد مشكلة مالية، أكيد في حاجة بتحرك المجرم أكبر من كده، اللي بيقتل مراته وولاده بيحركه إيه؟ زيّ بالظبط اللي بيقتل حد علشان يسرق ملاليم، أكيد في حاجات إنسانية وأهمها الرحمة اتقتلت عنده قبل ما يرتكب الجرايم دي.