للمصريين في مهرجان “كان” السينمائي قصة طويلة من النجاحات، كان أبرزها قصة يوسف شاهين اللي أترشحت أفلامه للجايزة الكبرى والسعفة الذهبية من الخمسينيات ولحد التسعينيات. السنة دي وفي دورة المهرجان ال75، ماغابتش مصر عن المهرجان ده كالعادة وشاركت في المهرجان بقوة بفيلم للمخرج والمؤلف المصري السويدي، طارق صالح، بفيلم “صبي من الجنة” في المسابقة الرسمية، وهو الفيلم اللي عمل جدل كبير في مصر.
عن الفيلم
أحداث فيلم “صبي من الجنة” بتدور في 2017 عن شاب ريفي اسمه آدم لعب دوره الممثل الفلسطيني، توفيق برهوم. والفيام إنتاج مؤسسة “مومنتو فيلم إنترناشيونال” و”أرت سينما فرانس”.
طارق صالح أتعاون مع نفس فريق العمل اللي أتعاون معاه في فيلمه اللي قبل كده، وهو مكون من مدير التصوير بيير أيم، والمونتير ثيس شميدت، ومصمم الإنتاج روجر روزنبرج، ومتخصص المؤثرات البصرية بيتر هورث.
مين هو طارق صالح؟
طارق من مواليد 28 يناير 1972، وأتولد في ستوكهولم بالسويد لأب مصري وأم سويدية. مارس طارق في بدايته مهن فنية محتلفة، زيّ صحفي ورسام جرافيتي، قبل ما يدخل عالم الرسوم المتحركة ويقدم برامج وينتج ويخرج أفلام قصيرة.
قدم من تأليفه وإخراجه وإنتاجه فيلم بعنوان “حادثة هيلتون النيل”، وشارك في بطولته اللبناني فارس فارس، والمصري محمد يسري، والفيلم فاز بجائزة مهرجان صندانس السينمائي سنة 2017.
بدأ طارق تصوير فيلم “صبي من الجنة” في تركيا، من يونيو لسبتمبر 2021 وكمله في السويد. والفيلم معاه دعم إنتاجي بقيمة 300 ألف يورو من مؤسسة “مومنتو فيلم إنترناشيونال” و”أرت سينما فرانس”.
طارق أخرج حلقة في مواسم المسلسل العالمي “West World”، اللي بدأ عرضه في 2016 على شبكة “HBO”، وشارك في بطولته أنتوني هوبكينز. وطارق كمان أخرج الفيلم الأمريكي “The Contractor” وهو فيلم أكشن، بطولة كريس باين، بن فوستر، وجيليان جاكوبس، وأتعرض الفيلم في أمريكا في 1 أبريل 2022.
وهنا عاوزين نشير لرأي الناقد الفني طارق الشناوي، واللي في مداخلة هاتفية مع الإعلامي عمرو أديب ببرنامج “الحكاية”، علق على الجايزة اللي فاز بيها المخرج طارق صالح، وقال: “فوز المخرج طارق صالح، بالجائزة لعبة سياسية، وهو أخد جايزة على أكتر حاجة سيئة في الفيلم، كان متوقع فوزه ولكن أنا لم أتوقع انه ياخد على السيناريو”.