بعد بلاغ تميم يونس والفنان عباس أبو الحسن ضد طبيب الأسنان المعروف بتحرشه للرجالة، كان في كلام كتير بيقول إنه هربان، وكان في كلام تاني بيقول إن مفيش أي خطوة اتاخدت ضده وهو موجود في عيادته عادي.
ولكن طلع عباس أبو الحسن، على حسابه “فيسبوك” وقال إنه اتقبض على الدكتور الهارب، طبيب الأسنان والمتحرش المتسلسل بالرجال، والنيابة العامة أمرت بحبسه 4 أيام على ذمة التحقيقات، وبيتواجه بشهادات الشهود ووقائع الضحايا وأقوالهم والمقاطع الجنسية الكاملة اللي متصورة في عيادته، بعد ما اتقبض عليه أول إمبارح.
وده جيه بعد ما قدموا بلاغات فيه وكانوا بيطالبوا بفتح تحقيق بسبب أفعاله اللي عملها في عيادته الخاصة معاهم، فالتحرش بالرجالة حاجة لازم نتكلم فيها برضه، لإنها هي هي نفس مشكلة التحرش بالستات وماينفعش نقلل منها، وماينفعش نداريها كمان علشان مثلًا خايفين مايتقالش علينا رجالة أو نفتكر إن ده هيقلل من رجولتنا، الصدمة اللي بيسببها التحرش سواء لرجالة أو ستات وسواء من رجالة أو ستات بتكون صدمة كبيرة، وقليل أوي من الضحايا بيقدروا يعدوها، ده إذا عرفوا يعدوها أصلًا.
التحرش جريمة لازم مرتكبها يتحاسب عليها بغض النظر عن سنه كام أو شغال إيه أو أيًا كانت مسميات المتحرش، وماينفعش نفضل ساكتين على الجريمة دي أو نستهين بيها، فمع الستات بنقول “أكيد هي اللي كانت طالبة ده”، وفي الرجالة بنقول “ما تسترجل”.. والموضوع بيكون بعيد كل البعد عن الضحية، فهو لا ليه علاقة بطلب الست ولا ليه علاقة برجولة الرجل، فهو كله بيرجع للمتحرش، لمرتكب الجريمة، فهو السبب في الحادثة دي، ومفيش حد غيره نلومه أو نحاسبه، ومفيش أي مبررات.