مرت سنة على طرح الفيديو الأصلي الخاص بمهرجان “إنتي معلمة” لـ”حمو بيكا” و”عمر كمال”، واللي حقق نجاح كبير جدًا في مصر والوطن العربي، وبقى واحد من أهم التريندات بتاعت السنة اللي فاتت، وبإجمالي مشاهدات على اليوتيوب تقدر بأكتر من 75 مليون مشاهدة ، أثبت المهرجان نفسه كواحد من أكتر المهراجانات شعبية في الوطن العربي كله.
وبعد سنة كاملة على صدور فيديو رقص لورديانة على “إنتي معلمة”، حقق الفيديو لحد دلوقتي 9.7 مليون مشاهدة على قناة عمر كمال، لكن بعد كل النجاح ده، رجع المهرجان بمصيبة جديدة على مطربين المهرجانات اللي مروا بأزمات كتير خلال الفترة اللي فاتت، وغالبًا دي مش هتكون آخِر أزماتهم.
حكمت المحكمة الاقتصادية في الإسكندرية، تحت رئاسة المستشار أحمد حسين الحداد، رئيس المحكمة، بالسجن لـ “حمو بيكا ” و” عمر كمال ” لمدة سنة واحدة، وكفالة بمبلغ 10 آلاف جنيه، والحكم صدر تحت وقف التنفيذ. وكمان قررت المحكمة براءة الراقصة البرازيلية “لورديانة” في واقعة التعدي على قيم ومبادئ الأسرة المصرية واستغلالهم مقطع فيديو للرقص والغناء علشان يتربحوا منه، وده على خلفية فيديو “إنتي معلمة”. وصدر الحكم على المتهمين تحت إشراف المستشار محمد مبروك، والمستشار محمد قنديل، والمستشار شريف منصور، وأمانة سر مصطفى يسرى.
واللي حصل في القضية دي بدأ لما أمرت نيابة الشئون المالية والتجارية ببدأ التحقيقات في واقعة نشر مغنيين المهرجانات حمو بيكا وعمر كمال والراقصة البرازيلية لورديانة مواد خادشة للحياء في صورة مقطع فيديو يسئ للأسرة المصرية على السوشيال ميديا، واتوجه للمتهمين التلاتة تهمة الإخلال بالآداب الاجتماعية العامة، وسوء استخدام وسائل الاتصال والإنترنت.
والمحضر فيه صور وحسابات المتهمين على السوشيال ميديا، اللي استخدموها علشان ينشروا الفيديوهات اللي اتذكرت في التحقيقات. وقالت التحقيقات إن الهدف من نشر الفيديوهات دي كان تحقيق الربح منها وكسب أموال طائلة، وبالتالي تم إحالة القضية إلى المحكمة الاقتصادية في الإسكندرية.
وكشف سعد متولي، المستشار القانوني لنقابة المهن الموسيقية، الإجراءات اللي بيتم تنفيذها بعد الحكم على واحد من أعضاء النقابة، ووضح إن النقابة مالهاش الحق تتدخل في الأحكام القضائية إلا بعد صدور حكم نهائي، وأكد إن النقابة مالهاش علاقة بمطرب المهرجانات الشعبية “حمو بيكا”، لإنه مش مقيد في نقابة الموسيقيين.
وأضاف سعد متولي إن قرار الحبس لمطربين المهرجانات عمر كمال وحمو بيكا مش نهائي، وعلشان كده النقابة ماتقدرش تُصدر أي قرارات أو تتدخل في الأحكام القضائية غير النهائية.
وقال كمان: “ثانيًا في النقابة ميخصناش حمو بيكا، بس عمر كمال عضو نقابي، ولو تم الحكم نهائي عليه، هيكون للنقابة إجراءات تانية، ونشوف هنا ممكن نعمل معاه إيه بعد الحكم عليه بالسجن، بس لحد دلوقتي الحكم ماتمش تنفيذه بشكل نهائي”.