حوادث الحرائق بقينا نسمعها كتير اليومين دول، وكان أخرهم حادثة كنيسة آبو سيفين في الجيزة وحادثة حريق في كارفور إسكندرية، شهود العيان بتحكي اللي حصل وبتقول إنهم سمعوا صوت انفجار ضخم اتسبب في تصاعد الدخان في منطقة الألعاب والسينمات والمطاعم. وفي روايتين بيفسروا اللي حصل؛ الرواية الأولى بتقول، ودي كانت بناءًا على شهود عيان، إن التيار الكهربائي كان مقطوع من امبارح في منطقة سيتي سنتر، وبالتالي ده دفع عدد كبير من المحلات إنهم يقفلوا بسبب عدم وجود كهرباء في المنطقة التجارية، وبالتالي اعتمدوا على مولدات الكهرباء، وأول ما النور جيه حصل انفجار في كل مولدات الكهرباء بسبب الماس كهربائي، بس في روايات تانية بتقول إن السبب هو انفجار التكييف المركزي اللي موجود أعلى سطح المول التجاري.
بعيدًا عن السبب الحقيقي ورا الحريق، سواء من ورا المولد ولا التكييف، بس القاسم المشترك إن ده بيتسبب في ماس كهربائي، وبالتالي الحريق بيحصل. وفي وسط ارتفاع في درجات الحرارة وإننا مالناش ملجأ غير الأجهزة الكهربائية والتكييف والمراوح، كنا محتاجين نعرف أكتر عن ازاي نتجنب حوادث زي ديّ في المستقبل، فاتكلمنا مع مهندس كهرباء وقالنا إيه الحاجات اللي ممكن نكون بنعملها غلط وبتوصل لنا للنتيجة دي.
ازاي نتجنب حدوث ماس كهربائي؟
قال لنا المهندس إن “لو تلاحظي إن أغلب الحوادث كانت بسبب التكييفات، الناس بتشغله على درجة حرارة قليلة جدًا وبالتالي التكييف مابيفصلش كهرباء، والشخص متوقع إنه هيشغله وهيحققلك النتيجة ودرجة الحرارة اللي أنت عايزها، لو درجة الحرارة عندك 45 محتاج تخلي التكييف على 27، لكن أنت بتعمله على 20 مش هينفع وهيفضل الجهاز شغال علشان يحقق الرقم اللي أنت عايزه ومش هيعرف، الاستمرارية دي مع عدم جودة الجهاز أو لو الجهاز مستهلك ده ممكن يسبب في حريق. ومن الأسباب التانية اللي ممكن تعمل ماس هي التحميل الزيادة، وده مش بنشوفه في الشتاء زيّ الصيف.”
وكمل كلامه “إن عدم جودة الأجهزة، اللي هي أهم حاجة، أو التوصيلات، أو لو في سوء توصيل وحاجة ملمسة هي أسباب أساسية في حدوث ماس كهربائي، علشان كده لازم صيانة دورية على الأجهزة، لدرجة إن فيشة الكهرباء الصغيرة دي لو مش كويسة تعمل حريق فلازم تكون بتتحمل التيار اللي أنا بسحبه؛ يعني ماينفعش لو عندك مخرج واحد بتاخد منه كهرباء أوصله بالمشترك وأحط عليه مكواة وغلاية وكذا حاجة واشغلهم كلهم مع بعض، لإن ساعتها الحمل كله هيروح على السلك بتاع المخرج ده.”
وسألناه هل لو سبنا الفيش من غير ما نشيلها ده ممكن يعمل ماس كهربائي، فقال “طالما الجهاز نفسه فاصل مفيش مشكلة لإن الماس بيحصل نتيجة حمل في سحب كهرباء، بس يُفضل إننا نشيل كل الفيش، يعني عندك سخان الكهرباء مثلًا بنسيبه على طول، بس لو أسلاكه نفسها مش مناسبة لحمل سحب الكهرباء ساعتها يحصل الحريق.”