على مرور السنين اللي فاتت استمر الفنان رامز جلال في التطوير من برنامجه، فبدأ من أول برنامج “رامز قلب الأسد” اللي كان بيحط للنجوم فيه أسد في وشهم، لحد ما تطور الموضوع لمراكب بتغرق، طيارات بتقع، ومباني بتولع! وزيّ ما كل سنة الناس بتستنى موسم رمضان علشان تتفرج على برنامج رامز جلال الجديد على الفطار، برضه كل سنة بنشوف ناس طالعة بتشتم في قسوة البرنامج وضرورة وقفه.
حتى السنة اللي فاتت حاولت النقابة منع عرض برنامج “رامز مجنون رسمي” ولكنهم ماقدروش لأسباب قانونية، فكان بيتعرض البرنامج على قناة “MBC MASR” والقوانين الإعلامية في مصر مش بتنطبق عليها، فاستمر البرنامج.. ولكن السنة دي واضح إن في إصرار على منع رامز من استمرار تقديم سلسلة برامج المقالب.. فحذره نقيب الإعلاميين في مصر من العواقب اللي هتواجهه لو قدم البرنامج، وقال إن رامز ماقدمش رسميًا للعضوية في النقابة، وده اللي مايخليش ليه صلاحية تقديم البرامج، وكمان التخويف والاستهزاء بنجوم كبار في سياق حلقاته مش مقبول.
بصراحة 2020 كانت سنة مخيفة لوحدها، والكل بقى خايف من غير أي برامج ولا مقالب تانية، بس لغاية ما نتأكد فعلًا من عدم مشاركة رامز في السباق الرمضاني اللي جاي، تعالوا نفتكر بعض ردود أفعال الفنانين اللي انهاروا وفقدوا أعصابهم خلال السنين اللي فاتت في مقالبه المختلفة..