مسلسل “الاختيار” بيحكي اللحظات الأخيرة من حياة الشهيد البطل المصري أحمد المنسي قبل استشهاده في شمال سيناء. بعد تاني حلقة من عرضه، المسلسل وصل تريند رقم واحد على يوتيوب، ومقطع من الحلقة التانية في خلال ساعات تخطى النص مليون مشاهدة. كل اللي شافوا المسلسل لحد دلوقتي بيشيدوا بقوة القصة وتمكن الممثلين من أدوارهم بالذات الفنان أمير كرارة اللي كان حريص على تجسيد دور الشهيد أحمد المنسي بشكل مُشَرِف يخلي العالم كله يعرف من هو البطل ده.
قبل المسلسل ناس كتير مكانتش تعرف مين هو أحمد المنسي وإيه هي قصته؛ البطل أحمد المنسي من مواليد سنة 1978 في محافظة الشرقية، واتخرج من ضمن طلبة الدفعة 92 في الكلية الحربية في مصر، بعدها بوقت مش كبير، تولى قيادة الفرقة 103 صاعقة بشمال سيناء، وبعد سنين من مكافحة الإرهاب نال الشهادة هو و10 من كتيبته سنة 2017 بعد هجوم انتحاري في رفح المصرية.
بعد حلقة أولى تعريفية بالأبطال وبالوضع في سيناء، اشتدت الأحداث في الحلقة التانية بعد ما قائد قوات الصاعقة اللي بيقوم بدوره ماجد المصري كلف أحمد المنسي وظابط من سلاح المظلات اللي بيقوم بدوره الممثل إياد نصار بعملية في مزرعة غرب شمال سيناء للقبض على عناصر إرهابية مسئولة عن عملية انتحارية راح ضحيتها شهداء من جنود مصر في رفح في شهر رمضان، الحلقة بتخلص والبطلين بيستعدوا للعملية وبيركبوا طيارة حربية من مطار العريش ومعاهم أسر ياسين اللي بيلعب دور ظابط من سلاح الجو.
أرملة الشهيد المنسي منار سليم قالت تعليقًا على المسلسل إن العَمَل شيء مشرف جدًا، وإنها حضرت جزء من التصوير وكانت فخورة جدًا بالناتج النهائي.
مسلسل “الاختيار” بيتعرض على قناة ON E وهو بطولة أمير كرارة وأحمد العوضى ودينا فؤاد وسارة عادل وضياء عبد الخالق وعدد كبير من ضيوف الشرف، منهم محمد إمام آسر ياسين ومحمد رجب وإياد نصار وكريم محمود عبد العزيز وماجد المصرى وصلاح عبد الله، ورامز أمير وحازم سمير ومحمد عز، ومها نصار وآخرين وهو تأليف باهر دويدار وإخراج بيتر ميمى وإنتاج شركة سينرجى.
الداعية علي الجفري على تويتر بتاعه شجع متابعينه إنهم يشوفوا المسلسل ودعا للشهيد بالرحمة ولمصر بالحفظ هي وكل البلاد.