بعد إعلان مجلس الوزراء قرار إلغاء كل احتفالات رأس السنة لمواجهة انتشار فيروس كورونا ومحاولة حصره، خصوصًا بعد دخولنا في الموجة التانية من الانتشار وزيادة أعداد المصابين، لازم نكون حريصين على صحتنا وعلى صحة كل اللي حوالينا ونتجنب التجمعات قدر الإمكان، لكن مناسبة زيّ الاحتفال برأس السنة وتوديع سنة صعبة زيّ 2020 كنا بنحلم إنه يكون باحتفالات كبيرة، لكن كل الخطط باظت للاحتفال برا، لكن لازم نحتفل ونتبسط حتى لو في البيت، علشان كده جيبنالك حفلات ممكن تتفرج عليها أونلاين في رأس السنة ونجوم هيتم استضافتهم في برامج وهيغنوا كمان.
حفلة تامر حسني ونانسي عجرم
بعد إلغاء حفلات يوم رأس السنة، قرر تامر ونانسي إنهم يشاركوا جمهورهم بحفلة مسجلة هتتعرض على شاشات التليفزيون ليلة رأس السنة، هتتذاع على قنوات أون والحياة، وهيبقى عندنا فرصة إننا نستمتع بحفلة لاتنين من أكبر نجوم الوطن العربي هيغنوا مع بعض.
ويجز وروبي وبهاء سلطان
بحلقة في برنامج صاحبة السعادة اللي بتقدمه الفنانة إسعاد يونس، ويجز وروبي وبهاء سلطان هيقدموا أغاني مختلفة على كل الأذواق، وروبي كمان هتحيي الحلقة بأغاني خاصة هتقدمها لأول مرة خلال البرنامج، الحلقة هتكون على شاشة DMC، أيًا كان ذوقك الموسيقي أكيد هتلاقيه في الحلقة دي وهتستمتع بأغاني بتحبها ليلة رأس السنة.
أحمد شيبة وعمر كمال
أما لو ذوقك على شعبي أو مواويل، هتستمتع بحلقة أحمد شيبة وعمر كمال اللي هتقدمها قناة النهار ليلة رأس السنة، هيقدموا فيها أشهر أغانيهم اللي الجمهور بيحبها، وكمان هيعلنوا عن أغاني حصرية هيغنوها لأول مرة في الحلقة. وهيتم إذاعتها الساعة 11 بليل.