أمال ماهر الصوت اللي قالوا عنه إنه قدر يخرج من عباءة أم كلثوم، صوت قادر إنه يسحرك في أي لون هو بيغنيه، سواء شجن وحزن أو حب أو انتصار، كل أغنية هي بتأديها قادرة إنها تعيشك في مود وحالة مختلفة، بس للأسف خسرناه كلنا النهارده، وقت ما أعلنت أمال ماهر اعتزالها على صفحتها الشخصية على تويتر، من غير ما تقول أي أسباب، وقالت عن ألبومها اللي كان من المقرر إنه يخرج للنور في الأيام الجاية، فهو مؤجل لأجل غير مسمى.
الصوت اللي حرك فينا مشاعر كتير مش هنعرف ننساه بسهولة، وأغانيها هتفضل عايشة معانا طول الوقت، علشان كده جبنالكم أقوى 5 أغاني اتعملت وعلمت مع الناس، وعشنا معاها لحظات مختلفة عن بعضها وكمان ناقش قضايا مختلفة، سواء أغاني تترات مسلسلات أو أغاني ضمن ألبوم.
اللي قادرة على التحدي
آخر أغنية اتعملت وحققت نجاح كبير وقتها بكلماتها القوية اللي قدرت تدعم المرأة بالشكل ده، ويمكن كان سبب نجاحها إنها أول أغنية تتعمل عن المرأة بالجرأة دي.
رايح بيا فين
عملت صدى حلو وقت عرضها من الكلمات والمزيكا، أغنية من كلمات نادر عبدالله وألحان وليد سعد.
طوبة فوق طوبة
اتعملت بعد الثورة، وقدرت توصل لنا إحساس مختلف عن حب البلد، وإننا نبني ونعمر من جديد بعد كل اللي حل البلد في الوقت ده، أغنية تعتبر رسالة أكتر منها أغنية.
قضية رأي عام
أهم أغنية اتعملت عن قضية الاغتصاب، كانت من ضمن تتر مسلسل قضية رأي عام، بطولة يسرا، المسلسل وقتها عمل ضجة في وسائل الإعلام علشان تناول قضية الاغتصاب بمنتهى الجرأة، والأغنية اتعملت وبروزت المسلسل والقضية كلها، وبقيت داعم ليها، الأغنية وكلماتها مع صوت أمال اللي مليان شجن وحزن قادر إنه يخليك تدمع ويحسسك بقهرة على اللي وصلنا ليه من انحدار في الأخلاق وإننا ازاي بنجيب الحق دايمًا على الضحية.
اتقى ربنا فيا
من الأغاني القديمة لأمال ماهر واللي عملت ضجة وقت عرضها، أظهرت فيها أمال مشاعر الجرح والحزن بدرجة كبيرة، وده يمكن اللي خلانا نتأثر بالأغنية وتعلق معانا كده.