من يومين اتعرضت آخر حلقة من مسلسل في بيتنا روبوت، المسلسل اللي أكيد معظمنا سمع عنه، وحتى لو في البداية ماكنش الكل حاطط أمل عليه لأسباب مختلفة، ولكن الأكيد إن وجهة النظر دي اتغيرت خالص بعد عرض كام حلقة ولحد النهاية.. سألنا ناس مختلفة عن مسلسل في بيتنا روبوت وليه كان المسلسل ده بالذات مختلف بالنسبة ليهم، فتعالوا نشوف الأسباب دي، ورأي الناس في الموضوع..
عنصر المفاجأة
المسلسل ده كان في تحديات كتير، فتقريبًا معظم فريق العمل كان ده أول تجربة درامية ليهم. يعني هشام جمال آه بيغني وبيألف، ولكن دي كانت أول تجربة تمثيل بالنسبة له، وعمرو وهبة كمان كانت أول تجربة نشوفله دور بالحجم الكبير ده.. وبالنسبة لليلى أحمد زاهر فإحنا اتعودنا نشوفها الطفلة الأروبة في الأعمال، لكن دي كانت أول تجربة ليها كبطلة مطلقة، وكمان طالعة بدور زوجة، وده اللي بعيد خالص عن اللي كان ممكن المشاهدين تتوقعوا وخصوصًا لصغر سنها.. ولكن التوليفة العظيمة دي وبرغم إنها كانت أول تجربة لكتير منهم، إلا إنهم قدروا يظهروا باحترافية وخفة دم على الشاشة، فعلًا فاجأوا الناس.
أغنية المسلسل
لو سألت الناس إيه أول حاجة خليتهم يتفرجوا على المسلسل، هيقولولك من غير تفكير “الأغنية”، الأغنية كلماتها خفيفة وكمان فكرة إن أبطال المسلسل نفسه هشام جمال وليلى أحمد زاهر هما اللي بيغنوا، أضاف موود كده للعمل كله، خلى الناس متشجعة إنها تتفرج، علشان الجواب بيبان من عنوانه زيّ ما بيقولوا مش كده؟ الأغنية لوحدها حققت نجاح كبير وتخطت المليون مشاهدة على يوتيوب!
كوميديا من نوع مختلف
“اللذيذ” في المسلسل ده هو إن نوع الكوميديا والإفيهات اللي بتتقال جديد ومختلف لإن الفكرة بتاعت المسلسل أصلًا جديدة جدًا.. فبالتالي الناس اتبسطت إنها تتفرج على كوميديا راقية وفي نفس الوقت مختلفة ومش النوع اللي إحنا اتعودنا نشوفها في السنين الآخيرة.
الكيميا بين فريق العمل
مفيش شك إن عنصر أساسي من نجاح أي عمل، بيجي لما الجمهور يحس إن الممثلين اللي فيه أصحاب في الحقيقة وبيحبوا بعض، لإن ده بيضيف عنصر authenticity كده أو بيدي مصداقية للعمل الدرامي، والحقيقة إن الـcast ده بالذات لا يعلى عليه لما نيجي للنقطة دي! من خلال منشوراتهم على صفحاتهم الخاصة على الانستجرام وفي اللقاءات التلفزيونية بنقدر نشوف إن فعلًا الروح الحلوة بينهم في الكواليس تفتح النفس على المسلسل!
المسلسل فعلًا حقق نجاح كبير من ناحية أرقام المشاهدة وكمان جماهيريًا، فألف مبروك لفريق العمل وشكرًا لتقديمكم لعمل مختلف وجميل، لم أفراد الأسرة حواليه وضحكهم من قلبهم!