بعد هروب 3 مساجين محكوم عليهم بالإعدام والمؤبد من سجن طنطا العمومي في محافظة الغربية، اتنين منهم من طنطا وواحد من كفر الشيخ متهمين في قضايا قتل وتجارة مخدرات وسلاح، صدر تعليمات من وزارة الداخلية بالتحقيق مع مأمور السجن، ومع العساكر اللي كانوا في خدمة المراقبة وقتها، وعملوا تحريات للأجهزة الأمنية وفتشوا الكاميرات واكتشفوا هما هربوا إزاي.
التلات مساجين هربوا بعد ما فضلوا يحفروا 3 شهور في حيطان السجن، وعطلوا كاميرات المراقبة، وطلعوا على السور، ونطوا على المساكن اللي حوالين السجن، وهربوا، ودلوقتي المسئولين بيحاولوا يكتشفوا هما إزاي عملوا كده، وإزاي عطلوا كاميرات المراقبة، وبيحققوا كمان مع الشهود من السكان علشان يسمعوا أقوالهم، والحكومة قايمة بدورها الكامل علشان يلاقوهم ويقبضوا عليهم.
اقرا كمان: التحقيق مع الطبيب النفسي المتهم بهتك عرض فتاتين بالقاهرة.
والقصة رغم إنها مرعبة وخطرة إن ناس زيّ دي تكون قدرت تهرب من السجن، ولكن الموضوع مضحكنا حبتين، لإنه بيفكرنا بحاجة، مش كده؟ ايوه زيّ ما قولتلوا كده بيفكرنا بالهروب الكبير اللي كان في مسلسل “بريزون بريك” المشهور اللي فضلوا يخططوا لهروبهم كتير وبفن وتكتيك، وكمان بيفكرنا أكتر بفيلم ذا شاوشانك ريديمبشن اللي بطل المسلسل فضل يحفر طول الفيلم لغاية ما قدر يهرب.
